Uko tombola y’Igikombe cya Afurika yarangiye Cameroun na Côte d’Ivoire bisanze mu Itsinda rimwe.

Tombola ku makipe yabashije kurenga amajonjora akagera mu matsinda y’Igikombe cya Afurika (AFCON 2025) yarangiye Cameroun yaritwaye inshuro eshanu na Côte d’Ivoire ibitse iriheruka, bihuriye mu Itsinda rimwe.

Kuri uyu wa Mbere, tariki ya 27 Mutarama 2025, ni bwo Impuzashyirahamwe ya Ruhago muri Afurika (CAF) yashyize ahagaragara uko amatsinda y’Igikombe cya Afurika azaba ateye, mu gikorwa cyabereye i Rabat muri Maroc.

Amakipe 24 yari agabanyije mu dukangara tune, yagombaga kugabanywa mu matsinda atandatu, agizwe n’ibihugu bine.

Abakinnyi b’Abanyafurika bakanyujijeho mu mupira w’amaguru, ari bo Mustapha Hadji, Serge Aurier, Aliou Cissé na Joseph Yobo, ni bo bagize uruhare muri iki gikorwa.

Perezida wa CAF, Patrice Motsepe, yagaragaje ko ubwiza bwa AFCON 2025, buzaba ari amateka. Ati “Iri rushanwa rizabera muri Maroc, nizeye ko ari ryo rizaba iry’amateka mu yandi yose yabayeho.”

Nyuma yo kumenya uko amatsinda ateye, umukino wa mbere uzaba tariki ya 21 Ukuboza 2025, ukazahuza Maroc yakiriye ndetse na Comores.

Itsinda (A) ryisanzemo Maroc izakira irushanwa, Comores, Zambia na Mali. Itsinda (B) ririmo Zimbabwe, Angola, Afurika y’Epfo na Misiri ifite amateka yo kuba yaregukanye iri rushanwa inshuro nyinshi zigera kuri zirindwi.

Itsinda (C) ririmo Tanzania na Uganda zo mu Karere ka Afurika y’Iburasirazuba, zikazahangana na Tunisia na Nigeria nk’amakipe y’ibigugu azatanga akazi muri iri rushanwa.

Itsinda (D) ririmo Botswana, Benin, Repubulika Iharanira Demokarasi ya Congo iheruka kugaragaza imbaraga mu riheruka, ndetse na Sénégal yari yagitwaye mu 2021.

Itsinda E ririmo Sudan, Guinée Equatoriale, Burkina Faso na Algeria, mu gihe Itsinda (F) ari na ryo rikomeye ririmo Mozambique, Gabon, Cameroun yaritwaye inshuro eshanu na Côte d’Ivoire ifite iki gikombe.

Amakipe abiri ya mbere muri buri tsinda, ni yo agomba guhita abona itike yo gukomeza muri ⅛, hiyongereho andi ane yabaye aya gatatu ariko yaritwaye neza.