Ubushyuhe bwinshi bwahitanye abantu 14 mu bitabiriye umutambagiro mutagatifu wa Hajj

Ibiro ntaramakuru by'Abafaransa AFP byatangaje ko umuryango w'ubutabazi wo muri Iran wa Croissant-Rouge wemeje ko Abanya-Iran batanu bapfuye abo bakaza biyongera ku bandi icyenda bapfiriye mu mutambagiro wa kisilamu wa Hajj muri Arabie Saoudite (Saudi Arabia) kubera ubushyuhe bwinshi.

Mbere yaho Minisiteri y'ububanyi n'amahanga ya Jordan yari yavuze ko abaturage bayo 14 bapfuye nyuma yo kugira ubushyuhe bwo mu mubiri buri hejuru ya dogere 40C  ndetse ko abandi 17 batangajwe ko baburiwe irengero.

Abategetsi bo muri Jordan bavuze ko hakomeje gushakishwa abo baburiwe irengero.

Mu itangazo, minisiteri y'ububanyi n'amahanga ya Jordan yavuze ko irimo gukorana n'abategetsi bo muri Arabie Saoudite ku buryo bwo gushyingura cyangwa gutahukana imirambo y'abapfuye, bijyanye n'ibyifuzo by'imiryango yabo.

Mu cyumweru gishize, ubushyuhe bwarenze dogere Celsius 46 (46C), bituma imihango myinshi ikorerwa hanze, n'iy'abantu bagenda n'amaguru iragorana, cyane cyane ku bageze mu zabukuru.

Ikigo cy'ubuvuzi kiri hafi y'umusozi wa Arafat cyakiriye abantu 225 bagize ikibazo cy'ubushyuhe bwinshi mu mubiri, nkuko byatangajwe n'ibiro ntaramakuru bya Arabie Saoudite.

Icyo gihe Minisiteri y'ubuzima ya Arabie Saoudite yanasohoye itangazo ryo kugira inama abari mu mutambagiro, ibasaba kunywa amazi menshi no kwirinda kujya hanze mu masaha y'umunsi arimo ubushyuhe bwinshi cyane yo hagati ya saa yine z'amanywa (10:00) na saa kumi z'umugoroba (16:00).

Hajj ni rimwe mu materaniro manini cyane ku isi. Abategetsi bo muri Arabie Saoudite bavuga ko uyu mwaka abantu barenga miliyoni 1.8 ari bo bitabiriye umutambagiro w'uyu mwaka.

Mu mwaka ushize bantu 240 barapfuye, mu mwaka wa 2015, mu byago bya mbere bibi cyane byabayeho muri Hajj, umubyigano wapfiriyemo abantu barenga 2,000.