Ubuhamya bushya: Perezida Kagame avuga uko Tshisekedi yubakiye ku ngengabitekerezo ya Jenoside

Mu kiganiro "𝕏 MINUTES" yagiranye n'umunyamakuru Mario Nawfa, Perezida Paul Kagame yashinje Perezida wa Repubulika Iharanira Demokarasi ya Congo (RDC), Félix Antoine Tshisekedi, kugira ingengabitekerezo ya Jenoside. Yavuze ko ibikorwa by’ubwicanyi n’itotezwa rikorerwa Abanyekongo bavuga Ikinyarwanda, by’umwihariko abo mu bwoko bw'Abatutsi, bifite imizi mu mateka y’ingengabitekerezo ya Jenoside yakwirakwijwe n'Interahamwe na Ex-FAR zahungiye muri Congo nyuma ya Jenoside yakorewe Abatutsi mu 1994.

Perezida Kagame yagarutse ku ruhare rwa FDLR muri ibi bikorwa, agaragaza ko uyu mutwe ugizwe ahanini n’abasize bahekuye u Rwanda, wakomeje gufashwa na Guverinoma ya Kinshasa mu mugambi wo kwibasira Abatutsi bo muri RDC no guhungabanya umutekano w’u Rwanda.

Perezida Kagame yagaragaje ko mu gihe amahanga akomeje gushinja u Rwanda kugira uruhare mu bibazo by’umutekano muke mu burasirazuba bwa Congo, nyamara RDC ari yo ikomeje gukorana na FDLR mu mugambi wo guhungabanya u Rwanda. Yibukije ko ubuyobozi bw'iki gihugu bwakomeje kugirana umubano n’uyu mutwe, aho Perezida Tshisekedi ubwe yemeye mu ruhame ko afite umugambi wo gukorana na FDLR kugira ngo agere ku ntego yo guhirika ubuyobozi bw’u Rwanda.

Ambasaderi Uhoraho w’u Rwanda mu Muryango w’Abibumbye, Ernest Rwamucyo, yavuze ko RDC irimo gukoresha u Rwanda nk’urwitwazo rwo guhunga ibibazo byayo nyamukuru bishingiye kuri ruswa n’imiyoborere mibi. Yongeyeho ko RDC yakomeje gusigasira no gushyigikira FDLR, n’ubwo izi neza ko ari umutwe w’abakoze Jenoside yakorewe Abatutsi mu 1994.

Mu gihe ingengabitekerezo ya Jenoside ikomeje gukwira muri RDC, byagaragaye ko hari umugambi wo gutsemba Abanyekongo b’Abatutsi bashinjwa kuba Abanyarwanda. Iri hohoterwa ryatumye ibihumbi amagana bahungira mu bihugu by’abaturanyi, bikaba ari na bo bakomokamo abarwanyi ba M23 bahagurutse guharanira uburenganzira bwabo no kurwanya ivangura rikomeje gukorerwa ubwoko bwabo.

Perezida Kagame yashimangiye ko ibibazo by’umutekano mu karere bishingiye ku mateka y’ubuyobozi bwa Congo, bwakomeje gukorana na FDLR ndetse bugashaka kwikiza Abanyekongo bafite inkomoko mu Rwanda, aho babita abanzi b’igihugu. Yagarutse kandi ku mubano yagiranye n’abayobozi bose ba Congo, barimo Laurent-Désiré Kabila, umuhungu we Joseph Kabila ndetse na Félix Tshisekedi, agaragaza ko nubwo baganiriye kenshi kuri ibi bibazo, ntacyakozwe kugira ngo amahoro arambye aboneke mu karere.

Mu gihe isi yose ikomeje gukurikirana ibibazo by’umutekano mu burasirazuba bwa Congo, Perezida Kagame agaragaza ko imvano y’ibi bibazo ari ubufatanye bwa RDC na FDLR ndetse n’ingengabitekerezo ya Jenoside ikomeje gukwirakwizwa muri icyo gihugu. Ku rundi ruhande, abarwanyi ba M23 bakomeje kurwana baharanira uburenganzira bw’Abanyekongo bose hadashingiwe ku ivangura iryo ari ryo ryose.

Ni ibihe bikomeje gutuma umubano w’u Rwanda na RDC uzamo igitotsi, aho u Rwanda rukomeje gutangaza ko rutazemera ko umutekano warwo utera imbere.