Perezida Kagame na Banki y’Isi mu bufatanye bushya: Imishinga igiye guteza imbere u Rwanda

Kuri uyu wa Mbere, tariki 10 Werurwe 2025, Perezida Paul Kagame yakiriye mu biro bye biri muri Village Urugwiro, Qimiao Fan, Umuyobozi wa Banki y’Isi ushinzwe ibihugu bya Kenya, Somalia, Uganda, n’u Rwanda.

Nk’uko byatangajwe n’Ibiro by’Umukuru w’Igihugu kuri X, ibiganiro byabo byibanze ku bufatanye busanzwe hagati ya Banki y’Isi n’u Rwanda, ndetse n’imishinga mishya izashyirwa mu bikorwa mu gihe kiri imbere.

Iyi si inshuro ya mbere aba bayobozi bahuye, kuko baherukaga guhura tariki 13 Gashyantare 2025, baganira ku bufatanye bw’impande zombi mu mishinga itandukanye. U Rwanda, rumaze imyaka irenga 60 rufitanye umubano na Banki y’Isi, kuva rwabaye umunyamuryango wayo tariki 30 Nzeri 1963.

Imishinga y’ingenzi hagati ya Banki y’Isi n’u Rwanda

Mu myaka ishize, ubufatanye bwa Guverinoma y’u Rwanda na Banki y’Isi bwagize uruhare rukomeye mu guteza imbere ubukungu, ubuhinzi, n’ibikorwa remezo.

  *Ubuzima n’uburezi: Muri Gicurasi 2019, hasinywe amasezerano y’inguzanyo ya miliyoni 60$ zo kongera serivisi z’ibanze ku mpunzi. Aya mafaranga afasha mu kubaka amashuri, ibigo nderabuzima, ndetse no gutanga amahugurwa ku myuga.

  *Ubuhinzi n’ubworozi: Guverinoma y’u Rwanda na Banki y’Isi basinyanye amasezerano y’inkunga ya miliyoni 26.3$ yo kongera umusaruro w’ubuhinzi. Uyu mushinga ugamije kongera umusaruro ku kigero cya 15% no guteza imbere amasoko ku kigero cya 25%, bikazagirira akamaro ingo z’abahinzi 38,000.

  *CDAT (Commercialization and De-risking for Agricultural Transformation Project): Muri Nzeri 2022, hatangijwe uyu mushinga wa miliyoni 235$, uzamara imyaka itanu. Ugamije kunoza ubuhinzi, kongera ibikorwa by'uhira, no gufasha abahinzi kubona inguzanyo n’ubwishingizi. Biteganyijwe ko uzagera ku bahinzi 235,977, aho by'umwihariko abagore n’urubyiruko bazitabwaho.

Ubufatanye bw’ahazaza

Bitewe n’iki kiganiro hagati ya Perezida Kagame na Qimiao Fan, hari impamvu yo kwizera ko ubufatanye hagati ya Banki y’Isi n’u Rwanda buzagera ku rundi rwego. Imishinga mishya yitezweho kuzamura ubukungu bw’igihugu, kongera ishoramari, no guteza imbere imibereho myiza y’abaturage.

Ibindi byemezo by’ingenzi bifatiwe muri iyi nama biracyategerejwe gutangazwa, ariko haragaragara icyizere cy’iterambere rishingiye ku bufatanye bw’ibi bigo byombi.