Sake mu muriro: Abasirikare ba MONUSCO  bakomerekeye mu mirwano yo kurwanya M23.

Itangazo ryashyizwe ahagaragara n’ubutumwa bw’amahoro bwa MONUSCO kuri uyu wa 24 Mutarama 2025, ryagaragaje ko imirwano ikaze yo guhagarika ibikorwa by’abarwanyi ba M23 mu Mujyi wa Sake yahitanye abarwanyi benshi ndetse ikomerekeramo abasirikare icyenda ba MONUSCO.

Iyi mirwano, izwi ku izina rya Operation Springbok 3, ni igikorwa cy’umutwe w’ingabo zidasanzwe (FIB) wa MONUSCO, cyashyize imbaraga mu gufatanya n’ingabo za FARDC gusubiza inyuma abarwanyi b’umutwe wa M23, by’umwihariko mu gace ka Sake gafatwa nk’ahantu h’ingenzi mu Ntara ya Kivu y’Amajyaruguru.

MONUSCO yatangaje ko iri gukorana neza na Leta ya Congo kugira ngo ibungabunge umutekano w’abaturage, nubwo ibikorwa by’ubutumwa bw’amahoro bikomeje kuba iby’umutekano muke ndetse n’igihombo ku ruhande rw’abasirikare.

Yatangaje ko abasirikare bayo barashe ku birindiro by’abarwanyi ba M23 muri Sake mu masaha 48 yashize, banashyira ibikoresho byabo mu nkengero z’Umujyi wa Goma kugira ngo bawurinde gufatwa.

MONUSCO yasobanuye ko mu gihe yari ihanganye na M23, abasirikare bane bayo bakomeretse tariki ya 23 Mutarama, abandi batanu bakomereka tariki ya 24 Mutarama 2025.

Ubutumwa bwabo bwongeye gushimangira ko baharanira amahoro arambye mu karere, nubwo ibikorwa by’abarwanyi bikomeje gushyira ubuzima bw’abasivile n’abasirikare mu kaga.

Tariki ya 22, iya 23 n’iya 24 Mutarama, M23 yaburiye abasirikare ba MONUSCO, ibamenyesha ko ifite uburenganzira bwose bwo kwirwanaho mu gihe babagabaho ibitero, bifatanyije n’ihuriro ry’abajenosideri.

Ihuriro M23 yise iry’abajenosideri rigizwe n’Ingabo za RDC, Umutwe wa FDLR washinzwe n’abakoze Jenoside yakorewe Abatutsi mu 1994, imitwe ya Wazalendo n’abacancuro b’Abanyaburayi.

Uyu muburo kandi wahawe ingabo z’Umuryango wa Afurika y’Amajyepfo (SAMIDRC) na zo ziri kwifatanya n’iri huriro mu kugaba ibitero ku birindiro bya M23, by’umwihariko kuva abarwanyi bayo bakwinjira muri Sake tariki ya 23 Mutarama.