Abasirikare ba FARDC na Wazalendo binjiye mu Rwanda: Uko bakiriwe n’aho imibereho yabo iganisha.

Abasirikare ba FARDC na Wazalendo basaga 100 bahungiye mu Rwanda bamanitse amaboko nyuma yo gutsindwa n’ingabo za M23 mu mirwano yo mu Burasirazuba bwa Repubulika Iharanira Demokarasi ya Congo.

Aba basirikare bageze mu Rwanda ku bushake, nyuma yo kubona ko urugamba rwabananiye, bamwe bahitamo gusezera burundu ku gisirikare.

Ambasaderi Vincent Karega, uhagarariye u Rwanda mu Karere k’Ibiyaga Bigari, yasuye aba basirikare kuri uyu wa Kabiri tariki ya 28 Mutarama 2025, mu Karere ka Rubavu.

Yagize ati: “Baje hano nk’impunzi zatsinzwe ku rugamba bafitanye na AFC/M23, tukaba twabakiriye nk’uko amategeko mpuzamahanga tuyubahiriza. Uduhungiyeho afite ibibazo iwabo turamwakira, si ubwa mbere twakira impunzi.”

Yongeyeho ko amahitamo y’ahazaza yabo azaterwa n’uko ibibazo mu burasirazuba bwa Congo bizakemuka.

Bamwe mu bahungiye mu Rwanda bagaragaje uburyo bishimira uko bakiriwe. Sylvain Habimana, w’imyaka 22, yavuze ko yavuye ku rugamba kugira ngo atange amahirwe ku buzima bushya.

Ati: “Sinshaka gusubira mu gisirikare, ndashaka akazi kazatuma nkoresha amaboko yanjye.” Uyu musore yashimangiye ko mu Rwanda yahawe ibyo kurya, ibiryamirwa, ndetse n’icyizere cy’ubuzima butandukanye n’ubwo yari afite.

Sous-lieutenant Kasore Lwembe Alex, umwe mu bageze mu Rwanda vuba, yavuze impamvu yahisemo kumanika amaboko. Ati: “Ba komanda bose badusize mu ntambara barigendera, niyo mpamvu natwe twahisemo guhagarika kurwana.”

Aba basirikare bari mu gihe cyo guhabwa ubufasha bw’ibanze mu mibereho yabo mu Rwanda. Umutekano, amafunguro, n’ibindi byangombwa by’ibanze birimo gutegurwa, mu gihe bategereje icyerekezo kizafata imibereho yabo, hagati yo gusubira iwabo cyangwa kuguma mu Rwanda.