Perezida Tshisekedi yicaye ku meza amwe n’intumwa ya Papa mugushakira umuti w’ikibazo cya Congo.

Kuri uyu wa kabiri, tariki ya 25 Gashyantare, Perezida Félix Tshisekedi yaganiriye, i Kinshasa, n’intumwa ya Papa muri Congo, Musenyeri Mitja Leskovar, ku ntambara yo mu burasirazuba bwa Repubulika iharanira demokarasi ya Congo n’ingaruka zikomeye z’ubutabazi.

Nk’uko iyi ntumwa ivuga, “Nyir’ubutungane” ashyigikiye igisubizo kivuye mu biganiro hagati y’abatavuga rumwe muri iki kibazo.

Inkuru yashyizwe ahagaragara na Radio Okapi ivuga ko bombi baganiriye cyane cyane ku buryo bwo kwimakaza amahoro kugira ngo imirwano ihagarare kandi abaturage baho (mu burasirazuba bwa DRC) basubire mu buzima bwabo busanzwe.

Ati: “Iki kibazo kiragoye, hari ababirimo benshi hanze ndetse no mu gihugu imbere. Papa Francis yahoze asaba guhagarika ihohoterwa no kuvugana. ”

Musenyeri Mitja Leskovar yashyigikiye igisubizo cya diplomasi kuri iki kibazo.

Ati: “Ntabwo gukoresha ingufu, intwaro, iterabwoba ku baturage ari byo byatuma ushobora kubona amahoro. Ni ngombwa guteranira ku meza (y’ibiganiro) kandi mukabwizanya ukuri ”.