Perezida Kagame yagiranye ikiganiro na mugenzi we wa Sénégal, Bassirou Diomaye Faye

Perezida Paul Kagame yagiranye ikiganiro kuri telefone na mugenzi we wa Sénégal, Bassirou Diomaye Faye cyagarutse ku ntambwe imaze guterwa mu gufasha Akarere kugera ku mahoro binyuze muri gahunda ihuriweho n'imiryango ya EAC na SADC.

Abinyujije ku rubuga rwa X, Perezida Kagame yavuze ko muri ibyo biganiro byiza yagiranye na Diomaye Faye, banagarutse no ku bufatanye bukomeye kandi bufitiye inyungu abaturage b'u Rwanda na Sénégal.

U Rwanda na Sénégal ni ibihugu bifitanye umubano mwiza, ushimangirwa n’ingendo zagiye zikorwa hagati y’abakuru b’ibihugu ndetse n’abandi bayobozi muri Guverinoma.

Perezida Kagame yaherukaga kugirana ibiganiro na mugenzi we wa Sénégal, Bassirou Diomaye Faye mu ntangiriro za Gashyantare uyu mwaka, aho byibanze ku kamaro k’ubufatanye bw’ibihugu bya Afurika mu gushaka ibisubizo birambye ku bibazo by’umutekano, bikunze kwibasira ibihugu byo kuri uyu Mugabane.