Liverpool, FC Barcelona na Bayern Munich zitwaye zite mu mikino ya ⅛ cya Champions League?

Mu ijoro ryo ku wa Gatatu, tariki ya 5 Werurwe 2025, habaye imikino ibanza ya ⅛ cy’irushanwa rya UEFA Champions League, aho amakipe akomeye ku mugabane w’u Burayi yagaragaje imbaraga zitandukanye. Liverpool yatsinze Paris Saint-Germain (PSG) igitego 1-0, FC Barcelona itsinda Benfica igitego 1-0, naho Bayern Munich itsinda Bayer Leverkusen ibitego 3-0.

Liverpool yatsinze PSG mu mukino ukomeye i Paris

Umukino wa PSG na Liverpool wari utegerejwe na benshi, wabereye kuri Parc des Princes. PSG yatangiye isatira cyane, aho Ousmane Dembélé na Bradley Barcola bakoreshaga umuvuduko mwinshi mu kwinjira mu rubuga rw’amahina rwa Liverpool. Ku munota wa 22, Khvicha Kvaratskhelia yatsindiye PSG igitego, ariko umusifuzi yitabaje VAR yemeza ko Vitinha wari wamuhaye umupira yari yaraririye.

PSG yakomeje gukina neza, ariko umunyezamu wa Liverpool, Allison Becker, akomeza gukiza izamu ry’iyi kipe y’Abongereza. Igice cya mbere cyarangiye amakipe yombi anganya 0-0.

Mu gice cya kabiri, amakipe yombi yakinaga bigoranye hagati mu kibuga, bituma uburyo bwinshi bw’ibitego bubura. Ku munota wa 86, Harvey Elliott yasimbuye Mohamed Salah. Nyuma y’umunota umwe gusa, yacomekewe umupira mwiza na Darwin Núñez atsinda igitego cy’intsinzi cya Liverpool.

Umukino warangiye Liverpool itsinze PSG 1-0, biyihesha amahirwe akomeye mbere y’umukino wo kwishyura uteganyijwe ku wa 11 Werurwe 2025.

Barcelona na Bayern na zo zabonye intsinzi

Mu yindi mikino yabaye:

·         FC Barcelona yatsinze Benfica igitego 1-0, cyatsinzwe na Raphinha.

·         Bayern Munich yatsinze Bayer Leverkusen ibitego 3-0, ishyira imbere amahirwe yo kugera mu kiciro gikurikiraho.

·         Inter Milan yatsinze Feyenoord ibitego 2-0.

Imikino yo kwishyura izaba ku wa Kabiri, tariki ya 11 Werurwe 2025, aho amakipe azaba akomeje guhatanira itike yo gukomeza muri ¼ cy’irushanwa.