Burundi: Abakinnyi barindwi bahanwe by’intangarugero bazira kugurisha imikino

Ishyirahamwe ry’Umupira w’Amaguru mu Burundi (FFB) ryafashe icyemezo gikomeye cyo guhana abakinnyi batandatu b’ikipe ya Académie Deira hamwe n’umukinnyi umwe wa Inter Star, nyuma yo guhamwa no kugurisha imikino (match-fixing). Aba bakinnyi, hamwe n’umutoza wabo wungirije, bahanishijwe ihazabu ya miliyoni 10 z’amafaranga y’amarundi (Fbu) buri umwe, kandi basabwe kuyishyura bitarenze tariki 10 Gicurasi 2025, bitaba ibyo bagahagarikwa burundu mu mupira w’amaguru.

Ibi bihano byatangajwe ku wa 10 Werurwe 2025 n’ishami rishinzwe imyitwarire muri FFB, nyuma y’iperereza ryagaragaje ko aba bakinnyi bemeye kwakira amafaranga kugira ngo bitsindishe mu mikino imwe n’imwe. By’umwihariko, umukino wahuje Académie Deira na Vital’o FC wagaragayemo ubu buriganya, aho umunyezamu wa Académie Deira yemeye ko yahawe miliyoni 8 Fbu n’umuntu uzwi ku izina rya “Ninja Américain” kugira ngo yitsindishe.

Uyu munyezamu yanavuze ko hari undi muntu wari wamwemereye miliyoni 20 Fbu kugira ngo yemere gutsindwa ibitego bitandatu. Nubwo bamwe mu bakinnyi banze kwijandika muri ubu buriganya, abandi batandatu bemeye kwakira ibihumbi 830 Fbu buri umwe, ndetse n’umutoza wabo wungirije.

Kugurisha imikino: ikibazo gihangayikishije isi yose

Kugurisha imikino ni ikibazo gikomeye gihangayikishije imiryango iyobora ruhago ku isi. Mu bindi bihugu nka Zimbabwe, mu 2019, abakinnyi barindwi bahagaritswe burundu bazira ubu buriganya. Mu 2024, umusifuzi wungirije wa Premier Soccer League muri Zimbabwe yahanishijwe igihano cy’imyaka itanu ndetse n’ihazabu ya $116,665 nyuma yo kwemera ruswa kugira ngo ahindure ibyavuye mu mukino wahuje Dynamos FC.

Abasesenguzi bavuga ko ibi bihano bikwiye kubera isomo abakinnyi n’abatoza bagifite umugambi wo kwijandika mu bikorwa bya match-fixing. Kugira ngo umupira w’amaguru ukomeze kwizerwa n’abafana, abafite aho bahuriye na wo bose basabwa kwimakaza ubunyangamugayo n’imyitwarire iboneye.