Kamonyi barahiga bukware uwateye undi Grenade amuziza kugirana umubano udasazwe n’umugore we.

Inzego zitandukanye zo mu Karere ka Kamonyi, zirimo guhiga bukware umuturage witwa Nkuriyingoma Jean Baptiste ushinjwa gutera mugenzi we grenade. Byabereye mu Kagari ka Mbati, Umurenge wa Mugina mu ka Kamonyi.

Meya w’Akarere ka Kamonyi Dr Nahayo Sylvère yabwiye UMUSEKE ko uyu Nkuriyingoma Jean Baptiste yateye grenade mu rugo rwa mugenzi we witwa Muganza Jean Marie Vianney bivugwa ko yashakaga kwihimura kubera ko uyu Muganza afitanye urukundo rudasanzwe n’Umugore wa Nkuriyingoma Jean Baptiste.

Dr Nahayo avuga ko uyu Nkuriyingoma yahise ayitera mu rugo rwa mugenzi we ariko kubw’amahirwe ntiyagira umuntu yica cyangwa ngo ikomeretse. Gusa yafashe urugi rw’Umuryango  irarwangiza.

Ati “Nkuriyingoma akimara gutera iyo grenade yahise acika, ubu inzego zatangiye kumushakisha.”

Ubuyobozi bw’Akarere buvuga ko Nkuriyingoma Jean Baptiste ari umuturage  usanzwe akora umwuga w’ubuhinzi, bukavuga ko uwakoze ibi afatwa kugira ngo aryozwe ibyo yakoze.