Abaturage bo mu cyaro cya Liria bahawe serivise z'ubuvuzi n'ingabo z'u Rwanda

Itsinda ry'ingabo z'u Rwanda ziri mu butumwa bw'umuryango w'abibumbye bwo kugarura amahoro muri Sudani y'Epfo zahaye serivise z'ubuvuzi abanya-Sudani y'Epfo bari mu byiciro bitandukanye.

Ni igikorwa cyakozwe hagati ya tariki ya 19 kugeza ku ya 22 Kanama 2024 mu cyaro cya Liria giherereye muri Leta ya Central Equatorial.

Iki ni kimwe mu bikorwa ingabo z'u Rwanda zakoze byo gufasha abaturage bo muri Sudani y'Epfo dore ko atari ubwa mbere ingabo z'u Rwanda zikora ibikorwa by'ubuvuzi mu bihugu bitandukanye zicungamo umutekano.

Ku bufatanye n'indorerezi za gisirikare zoherejwe n'ubuyobozi bwa UNMISS, abasirikare b'u Rwanda kandi baganiriye n'abaturage bo muri icyo cyaro hamwe n'abayobozi babo kugirango bamenye imitererere y'umutekano w'ako gace.