AFC/M23 yongeye kwigarurira undi mujyi munini mu Ntara ya Kivu ya Ruguru

Kuri uyu wa Gatatu, tariki ya 19 Werurwe 2025, umutwe wa AFC/M23 wafashe umujyi wa Walikale mu Ntara ya Kivu ya Ruguru, nk’uko byemejwe na Radio Okapi. Nubwo ifatwa ry’uyu mujyi ritumvikanyemo imirwano ikomeye, hari amasasu macye yumvikanye mbere y’uko M23 iwufata.

Ibi bibaye mu gihe hari agahenge kari kumvikanwaho hagati ya Repubulika Iharanira Demokarasi ya Congo (RDC) n’u Rwanda, igihugu cyakomeje kuvuga ko nta bufasha giha M23. Ni mu gihe kandi Perezida wa Congo, Félix Tshisekedi, aherutse kuganira na mugenzi we w’u Rwanda, Paul Kagame, i Doha muri Qatar ku cyakorwa kugira ngo imirwano mu Burasirazuba bwa Congo ihagarare.

Ifatwa rya Walikale kandi ribaye nyuma y’uko Umuryango w’Ubumwe bw’u Burayi ufashe ibihano kuri bamwe mu bayobozi ba AFC/M23, bikaba byaratumye ibiganiro by’amahoro bari bagiranye na leta ya Congo bisubikwa. AFC/M23 ivuga ko ibi bihano bigamije gukoma mu nkokora ibiganiro by’amahoro, ndetse bikaha Perezida Tshisekedi urwaho rwo gukomeza intambara mu Burasirazuba bwa Congo.

Kugeza ubu, nta cyatangajwe na AFC/M23 ku ifatwa ry’uyu mujyi, ndetse na leta ya Congo ntiragira icyo ivuga kuri ibi bintu bishya bibaye mu ntambara ikomeje kwibasira Intara ya Kivu ya Ruguru.