Umutoza wa Real Madrid yasabiwe igifungo cy'imyaka 4

Kuri uyu wa gatatu Carlo Ancelotti utoza ikipe ya Real Madrid yo muri Esupanye yasabiwe gufungwa imyaka 4 n'amezi icyenda kubera ko hagati ya 2014 na 2015 ashinjwa kuba atarishyuye imisoro ingana na miliyoni imwe y'Amayero.

Uyu mutoza uhakana ko atigeze yanga kwishyura imisoro arashinjwa ko yafunguye kompanyi zitazwi kugira ngo ajye ahishamo ayo yinjizaga hagati y'umwaka wa 2014 na 2015. Ubwo yinjiraga mu rukiko uyu munsi abanyamakuru bamubajije niba yizeye abacamanza asubiza ko abizeye cyane.

Ubwo umwaka ushize yireguraga uyu mutoza yavuze ko ubushinjacyaha bwamureze kutishyura imisoro kandi muri iyo myaka ataragombaga kubarwa nkukorera muri Esupanye. Muri Werurwe 2024 uyu mugabo yagize ati '' Namaze kwishyura, amafaranga barayafite, ubu abanyamatego banjye barigushaka igisubizo, reka tuzarebe icyo abacamanza bazavuga.''

Carlo Ancelotti w'imyaka 65 amaze gutwara Champions League inshuro 5, yatwaye ibikombe 3 mu ikipe ya Real Madrid, atwara 2 muri AC Milan. Yatwaye ibikombe bya shampiyona mu bihugu birimo Ubwongereza, Ubufaransa, Italy, Spain ndetse no mu Budage.

Mu mwaka wa 2019 Jose Mourinho yahawe igihano cy'igifungo cy'umwaka umwe usubitswe kubera kutishyura imisoro.

Lionel Messi na Cristiano Ronaldo nabo ubwo bakinaga muri Esupanye bagiye bashinjwa kutishyura imisoro. Kimwe na Ancelotti abo nabo bashinjwaga gufungura kompanyi hanze y'igihugu cya Esupanye kugira ngo bajye bahishamo ibyo binjizaga bitume batishyura imisoro myinshi.

Ronaldo yaje kwemera kwishyura miliyoni 19 z'amayero mu mwaka wa 2019 nyuma yuko yari yakatiwe igifungo cy'imyaka ibiri atigeze akora.