U Rwanda rwongeye kwishyuza u Bwongereza Miliyari zisaga 89 Frw nyuma y’ibihano bidasobanutse.

U Rwanda rwongeye gusaba Leta y’u Bwongereza kwishyura miliyoni 50 z’amapawundi (abarirwa muri miliyari zisaga 89 Frw) nyuma y’uko u Bwongereza butubahirije amasezerano yo kohereza abimukira mu Rwanda.

U Bwongereza bwari bwasabye u Rwanda kutishyuza ayo mafaranga hashingiwe ku mubano mwiza ibihugu byombi byari bifitanye. Icyakora, u Rwanda rwahinduye icyemezo nyuma y'ibihano bwafatiwe, buvuga ko rwashimangiye ingamba zo kurinda umutekano ku mupaka uruhuza na RDC.

Ni nyuma y’uko umutwe wa M23 wafashe imijyi ya Goma na Bukavu, ibintu byarakaje RDC ikomeza gushinja u Rwanda gufasha M23, mu gihe rwo rubihakana, rukavuga ko ari urwitwazo rwa Congo ku bibazo by’imbere mu gihugu.

Indi mpamvu yatumye u Rwanda rusaba kwishyurwa ayo mafaranga ni amagambo yavuzwe na Minisitiri w’u Bwongereza ushinzwe Afurika, Lord Collins, ku wa 26 Gashyantare 2025, ubwo yashinjaga u Rwanda guhonyora uburenganzira bwa muntu.

Umuvugizi wa Guverinoma y’u Rwanda, Yolande Makolo, yavuze ko UK igomba kwishyura kuko amasezerano abiteganya.

Yagize ati "Turishyuza ayo mafaranga rero, kuko amasezerano ateganya ko Leta y’u Bwongereza igomba kuyishyura."