U Rwanda rwavuze iki ku magambo yavuzwe na Perezida Ndayishimiye?

Guverinoma y’u Rwanda yamaganye ibyavuzwe na Perezida w’u Burundi, Evariste Ndayishimiye, aho yongeye gushinja u Rwanda gufasha umutwe wa RED-Tabara urwanya ubutegetsi bwe. U Rwanda rwavuze ko aya magambo atari ukuri kandi abangamira inzira y’ibiganiro byari byaratangiye bigamije kuzahura umubano w’Ibihugu byombi.

Ibyatangajwe na Perezida Ndayishimiye

Mu kiganiro yagiranye na BBC, Perezida Ndayishimiye yavuze ko u Rwanda rufite umugambi wo gukoresha umutwe wa RED-Tabara kugira ngo rutere u Burundi binyuze muri Repubulika Iharanira Demokarasi ya Congo (RDC).

Yagize ati: “Mu gihe u Rwanda rwaba rushaka gutera Bujumbura baciye muri Congo, natwe Kigali si kure duciye mu Kirundo.”

Aya magambo yatangajwe mu gihe hari ibiganiro byari bimaze iminsi bihuje abayobozi b’inzego z’ubutasi bw’Ibihugu byombi mu Ntara ya Kirundo. Ibyo biganiro byari bigamije gukemura ibibazo by’umutekano no kurebera hamwe uko umubano w’u Rwanda n’u Burundi wasubira mu buryo.

U Rwanda rwavuze iki?

Minisitiri w’Ububanyi n’Amahanga n’Ubutwererane w’u Rwanda, Amb. Olivier Nduhungirehe, abinyujije kuri X, yavuze ko amagambo ya Perezida Ndayishimiye ababaje cyane kuko asebya intambwe yari imaze guterwa mu biganiro.

Yagize ati: “Amagambo ya Nyakubahwa Perezida w’u Burundi arababaje cyane, mu gihe abayobozi b’Igisirikare n’ubutasi b’Ibihugu byombi bari bari mu biganiro, kandi bari bamaze kugera ku kwemeranya ko hagomba kubaho gucubya umwuka mubi yaba mu bya gisirikare ndetse no mu mvugo.”

Minisitiri Nduhungirehe yagaragaje ko yari yaganiriye na mugenzi we w’u Burundi kuri iki kibazo ubwo bahuriraga mu nama yahuje Abaminisitiri b’Ububanyi n’Amahanga ba EAC na SADC i Harare ku wa 17 Werurwe 2025. Icyo gihe, ngo bumvikanye ko hakenewe uburyo bwihuse bwo gukemura ibibazo hagati y’Ibihugu byombi.

Ibiganiro bizarangira bite?

Mu gihe amagambo ya Perezida Ndayishimiye yateye urujijo, u Rwanda rwemeje ko ruzakomeza guharanira amahoro n’ubwumvikane n’u Burundi ndetse no mu karere k’Ibiyaga Bigari.

Mu kiganiro aherutse kugirana n’abaturage, Perezida Paul Kagame yavuze ko hari kimwe mu Bihugu by’ibituranyi by’u Rwanda cyahindukiye, kikagaragaza ubushake bwo gukemura ibibazo. Nubwo atavuze izina, benshi bakeka ko yashakaga kuvuga u Burundi. Ibi byanashimangiwe na Minisitiri Nduhungirehe, wavuze ko ibiganiro bikiri mu ntangiriro ariko bifite icyizere.

Nubwo amagambo ya Perezida Ndayishimiye ashobora kuba yasubije inyuma urugendo rwo kuzahura umubano, haracyari icyizere ko ibiganiro bizakomeza kugira ngo Ibihugu byombi bisubirane ubusabane bwiza