U Rwanda na Afurika y’Epfo byiyemeje gukomeza ibiganiro ku kibazo cy’Uburasirazuba bwa Congo.

Mu rwego rwo gushakira umuti ibibazo by’umutekano mu burasirazuba bwa Repubulika Iharanira Demokarasi ya Congo (DRC), Minisitiri w’Ububanyi n’Amahanga n’Ubutwererane w’u Rwanda, Ambasaderi Olivier Nduhungirehe, yagiranye ikiganiro kuri telefone na mugenzi we wa Afurika y’Epfo, Ronald Lamola, aho bemeranyije gukomeza ubufatanye mu gushimangira amahoro mu karere.

Minisitiri Lamola ni we wabanje gutangaza aya makuru mu butumwa yacishije ku mbuga nkoranyambaga, aho yagaragaje ko ibiganiro bagiranye byibanze ku kibazo cy’umutekano mu burasirazuba bwa Congo.

Yagize ati: "Nagiranye ikiganiro kuri telefone na Minisitiri Olivier Nduhungirehe. Twiyemeje gukomeza gutera intambwe y’ibiganiro ku bibazo biri mu burasirazuba bwa DRC kandi twemeranyije gushyigikira umurongo w’amasezerano yo guhagarika imirwano nk’uko byemejwe n’Abakuru b’Ibihugu byacu ndetse n’ay’ibiganiro by’akarere nka SADC n’Umuryango wa Afurika y’Iburasirazuba (EAC)."

Minisitiri w’Ububanyi n’Amahanga w’u Rwanda, Ambasaderi Olivier Nduhungirehe, na we yashimye mugenzi we wa Afurika y’Epfo, avuga ko u Rwanda ruzakomeza kugira uruhare mu gushakira amahoro akarere.

Mu butumwa yanditse kuri X mu gitondo cyo kuri uyu wa Gatanu, Amb. Nduhungirehe yagize ati: “Wakoze muvandimwe Ronald Lamola ku bw’ikiganiro cyubaka twagiranye mu ijoro ryatambutse. U Rwanda ruzakomeza kurangwa n’ubushake bwo kwifuriza amahoro n’ituze Uburasirazuba bwa DRC. Twiteguye gukorana na Afurika y’Epfo mu mwuka wo kumva ibintu kimwe mu karere kacu ndetse no ku Mugabane wose.”

Ikiganiro cy’Abaminisitiri gikurikiye ibiganiro by’Abakuru b’Ibihugu

Uku kuvugana kw’abaminisitiri kwabaye nyuma y’uko muri iki cyumweru habaye ibiganiro hagati ya Perezida Paul Kagame n’uwa Afurika y’Epfo, Cyril Ramaphosa. Ibyo biganiro byakurikiwe n’itangazo rya Perezida Ramaphosa ryateje impaka, aho yise Igisirikare cy’u Rwanda (RDF) "umutwe w’inyeshyamba," bikaba byaratumye Perezida Kagame amusaba gukosora ayo magambo.

Perezida Kagame yanatangaje ko Perezida Ramaphosa yamwemereye ko abasirikare 13 ba Afurika y’Epfo baguye mu mirwano ihanganishije FARDC na M23 bishwe na FARDC ubwayo, aho kuba M23 nk’uko byari byatangajwe mbere.

U Rwanda rwiteguye gukomeza ubufatanye no gusobanura uruhare rwarwo

Mu gihe umubano w’u Rwanda na Afurika y’Epfo wari utangiye kugenda ushyuha kubera amagambo yatangajwe nyuma y’ibiganiro by’abakuru b’ibihugu byombi, ikiganiro cyabaye hagati y’abaminisitiri b’ububanyi n’amahanga cyagaragaje ko impande zombi zifite ubushake bwo gukomeza ibiganiro no gushakira ibisubizo ibibazo byugarije akarere. 

U Rwanda rwagaragaje ubushake bwo gukorana n’ibihugu byo mu karere no ku mugabane wose mu guharanira amahoro, nk’uko byagarutsweho na Minisitiri Nduhungirehe.

Biracyari ikibazo niba ibi biganiro bizatuma umubano w’u Rwanda na Afurika y’Epfo wongera gusubira ku murongo, ariko igisobanuro cyatanzwe n’abayobozi bombi kirerekana ko inzira y’ibiganiro igikomeje.