Tehran yihanangirije u Bwongereza n’Amerika

Nyuma y’uko Perezida wa Leta Zunze Ubumwe za Amerika, Donald Trump, atangaje ko Iran ishobora guhura n’ingaruka zikomeye mu gihe itumvikanye ku masezerano yo kudakora intwaro za kirimbuzi, Tehran yahise itanga umuburo ukomeye ku Bwongereza na Amerika, ivuga ko izagaba igitero kuri Diego Garcia, ahari ibirindiro by’ingabo zirwanira mu mazi z’ibi bihugu.

Ku wa Gatandatu, ikinyamakuru Telegraph cyasubiyemo amagambo y’umuyobozi mukuru w’igisirikare cya Iran, aho yemeje ko Tehran izibasira ibi birindiro mu gihe hagira igitero icyo ari cyo cyose gikozwe kuri Iran. Diego Garcia, iri mu birwa bya Chagos mu Nyanja y’u Buhinde, ni ahantu hafite akamaro kanini ku ngabo za Amerika n’u Bwongereza, kuko hakunze kuba ibikorwa by’ubutasi n’ubutumwa bwihariye bw’igisirikare.

Iri tangazo ry’Iran rije mu gihe ubushyamirane hagati y’iki gihugu n’Uburengerazuba bukomeje kwiyongera, cyane cyane nyuma yo gutangaza ko Iran yaba iri hafi kugera ku bushobozi bwo gukora intwaro za kirimbuzi. Trump, uzwiho kugira imvugo ikaze ku bijyanye n’ibibazo by’umutekano mpuzamahanga, yemeje ko azakora ibishoboka byose kugira ngo Iran idashobora kubona izo ntwaro.

Ku rundi ruhande, u Bwongereza n’Amerika ntibaragira icyo batangaza ku byatangajwe na Iran, ariko inzobere mu by’umutekano mpuzamahanga zigaragaza ko ibi bishobora gukomeza gukaza umwuka mubi hagati y’ibi bihugu. Bamwe mu basesenguzi bemeza ko Iran ishobora kuba iri kugerageza kwerekana ko ifite ubushobozi bwo gusubiza igitero icyo ari cyo cyose, mu gihe Amerika nayo yagaragaje ko idashobora kwihanganira imyitwarire ya Tehran.

Uko ibintu bizagenda bigenda bigaragara mu minsi iri imbere bizagaragaza niba koko Iran izakomeza kuri uwo murongo, cyangwa niba hari ibiganiro bishobora gukorwa hagamijwe gushakira umuti iki kibazo cy’ingutu gikomeje guteza impagarara mu karere no ku rwego mpuzamahanga.