RIB yihanangirije abakoresha imbuga nkoranyambaga ku mvugo zigoreka ukuri kuri Jenoside

Mu gihe u Rwanda n’Isi yose bibuka ku nshuro ya 31 Jenoside yakorewe Abatutsi mu 1994, Urwego rw’Igihugu rw’Ubugenzacyaha (RIB) rwasabye abakoresha imbuga nkoranyambaga kwitwararika no kwirinda gukwirakwiza amagambo agoreka ukuri kuri Jenoside.

Mu butumwa RIB yasohoye kuri uyu wa Mbere tariki ya 7 Mata 2025, bwibanda ku kurwanya ingengabitekerezo ya Jenoside, Urwego rw’Ubugenzacyaha rwasabye abantu bose gukoresha imbuga nkoranyambaga mu buryo bwubahiriza amategeko n’ukuri ku byabaye.

RIB yagize iti: "Abakoresha imbuga nkoranyambaga birinde imvugo zigoreka ukuri kuri Jenoside yakorewe Abatutsi, bigamije kuyobya rubanda nko kugabanya uburemere cyangwa ingaruka za Jenoside, koroshya uburyo Jenoside yakozwemo cyangwa kugaragaza imibare itariyo y’abazize Jenoside yakorewe Abatutsi.”

RIB kandi yibukije ko ibikorwa nk’ingengabitekerezo ya Jenoside, guhakana, gupfobya, guha ishingiro Jenoside yakorewe Abatutsi cyangwa gutesha agaciro ibimenyetso byayo, binyuranyije n’amategeko y’u Rwanda kandi bigomba kwamaganwa.

Ikindi ni uko RIB yagarutse ku bikorwa bigayitse bigamije guhohotera abarokotse Jenoside, birimo kwangiza imitungo yabo, konona urwibutso rwa Jenoside cyangwa kubasubiza mu bihe bibabaje banyuzemo.

Yakomeje igira iti: “Twamaganye imigirire irimo gutema amatungo, imyaka, kwangiza umutungo w’uwacitse ku icumu, kuzimiza cyangwa konona ibirango bigaragaza Jenoside, imvugo zo gusesereza abarokotse n’izikurura amacakubiri.”

Mu gihe u Rwanda rwinjiye mu minsi 100 yo kwibuka, RIB isaba buri wese gukomeza kubahiriza amategeko, kurangwa n’ubupfura no gutanga umusanzu mu kurinda ukuri kuri Jenoside yakorewe Abatutsi.