Syria: Perezida Bashar al-Assad yahiritswe ku butegetsi.

Inyeshyamba za Hayʼat Tahrir al-Sham (HTS) zari zimaze ibyumweru bibiri zubuye imirwano muri Syria, ubu zamaze gufata ubutegetsi nk’uko umuyobozi wabo yabitangarije kuri  televiziyo ya leta.

Umuyobozi w’izi nyeshyamba Abu Mohammed al-Julani yatangarije kuri televiziyo ya Leta ko barangije gufata Umurwa mukuru Damascus ndetse ubutegetsi bukaba buri mu biganza bya Minisitiri w’intebe ibindi bikazakurikiraho nyuma.

Izindi nkuru zica mu bitangazamakuru byo mu Burengerazuba bw’Isi nka CNN, The Guardian n’ibindi, baremeza ko Perezida Bashar al-Assad yaba yahunze Igihugu nubwo nta makuru afatika aramenyekana y’aho yaba aherereye.

Izi nyeshyamba zubuye imirwano mu mpera z’Ugushyingo 2024 ndetse kumuvuduko munini zihita zigarurira umujyi wa Aleppo zikomereza no mu yindi mijyi ikomeye ingabo za Assad zababona zigakizwa n’amaguru.

Izi nyeshyamba byemezwa ko zishyigikiwe n’Ibihugu byo mu Burengerazuba bw’Isi ku isonga Amerika, Ubwongereza na Israel. Ni mu gihe Syria nayo yari ishyigikiwe na Russia, Iran, Abashinwa n’abandi.