Rwamagana: Abakekwaho ubwicanyi barashwe bashaka kunigisha Polisi amapingu

Mu rukerera rwo ku wa Mbere, tariki 11 Kanama 2025, mu Murenge wa Muyumbu, Akarere ka Rwamagana, abagabo babiri bakekwaho kwica abazamu babiri b’ububiko bw’inzoga barashwe ubwo barwanyaga inzego z’umutekano. 

Aba bagabo bashinjwaga kwica Mudaheranwa Venuste na Bizimana Mark mu mpera za Nyakanga, bakoresheje imigozi n’ibyuma, nyuma bakiba bimwe mu bikoresho birimo amacupa 300 y’inzoga za Bralirwa n’imashini ya EBM. Polisi yavuze ko barashwe ubwo bashakaga kunigisha amapingu Abapolisi bari babaherekeje bagiye kugaragaza aho bahishe ibyo biba.

Umuvugizi wa Polisi mu Ntara y'Iburasirazuba SP Hamdun Twizeyimana  yagize ati "Abo bagabo bombi byagaragaye ko bagize uruhare mu bwicanyi ndetse n’ubujura buheruka gukorerwa ku Muyumbu. Ubwo bari bagiye kugaragaza aho bahishe amakaziye 300 y’ibinyobwa bya Bralirwa n’imashini ya EBM bajyanye, barashwe bashaka kunigisha amapingu Abapolisi bari babarinze.”

Ubwo bwicanyi bwateje impungenge mu baturage b’aho bwabereye, aho basabye ko hakazwa ingamba z’umutekano mu rwego rwo kurinda ibindi bikorwa nk’ibi. Bamwe bavuga ko hakwiye kongerwa umucyo mu marondo no gukaza ubugenzuzi ku bibanza n’ububiko by’umwihariko mu masaha y’ijoro.

Polisi y’u Rwanda ikomeje gusaba abaturage gutanga amakuru ku gihe ku bakekwaho ibyaha, kugira ngo birinde ko habaho kwihorera cyangwa kwangiza ubuzima bw’inzego z’umutekano.