Rubavu: Ababuriye ubuzima mu masasu yavaga muri Congo bari gufashwa na Leta  y’u Rwanda.

Umuvugizi wungirije wa Guverinoma Alain Mukaralinda yavuze ko Leta y’u Rwanda iri gufasha mu bikorwa bijyanye no gushyingura abantu 9 bishwe n’amasasu yaturutse muri Repubulika ya Demokarasi ya Kongo, ndetse no mu kuvuza abakomeretse.

Umuvugizi yabisobanuye mu kiganiro Ubyumva Ute cya KTRadio, kuri uyu wa Kabiri tariki 28 Mutarama 2025, aho yasobanuye byinshi ku bijyanye n’umutekano mu Mujyi wa Rubavu.

Yasobanuye ko bamwe muri abo bishwe n’ibyo bisasu bashyinguwe ku wa 28 Mutarama, bikaba biteganyijwe ko abandi bazashyingurwa kuri uyu wa 29 Mutarama.

Guverinoma y’u Rwanda ngo ni yo irimo kubikora ndetse inavuza abakomeretse bari mu bitaro bitandukanye yaba ibyo mu Karere ka Rubavu, mu Bitaro bya Musanze no mu Bitaro by’i Kigali.

Mukuralinda yavuze ko ku mupaka wa Rubavu muri iyi minsi hinjiye abantu benshi bahunga intambara muri RDC, harimo abinjira bafite amikoro bakajya gucumbika mu mahoteli mu Rwanda, abandi bakajya mu miryango n’inshuti zabo, ariko kandi n’abandi bafite amikoro macye nabo u Rwanda rwakiriye nk’impunzi zisanzwe, ubu bakaba bacumbikiwe muri Site ya Rugerero.

Aba na bo bahabwa iby’ibanze bakeneye kugira ngo bashobore kubaho, harimo ibiribwa, ibinyobwa, imiti, aho baba n’ibindi.

Hari kandi abakozi b’Umuryango w’abibumbye n’imiryango yabo bagera ku 1822 baraye bambutse kuwa 27 Mutarama 2025, bakirwa neza muri za Bisi nini zagiye kubakura ku mupaka zibajyana aho bacumbika,ndetse bagakomeza kwitabwaho uko bikwiye binyuze mu bwumvikane hagati ya Minisiteri y’Ububanyi n’amahanga y’u Rwanda n’Umuryango mpuzamahanga, kuko ari abakozi bawo.

Yasobanuye ko umutekano muri Rubavu umeze neza, ndetse abantu bakaba basubiye mu bikorwa byabo nubwo atari ku rwego rw’ijana ku ijana, ariko nibura ibintu ngo byasubiye ku murongo ku kigero cya 70% ku buryo kuri uyu wa Gatatu tariki 29 Mutarama, abana bazasubira ku mashuri.

Mu minsi ibiri ishize, hari abataragiyeyo, kubera ko hari n’amashuri yegereye umupaka cyane ndetse abana bamwe bakaba barakomerekejwe n’ayo masasu aturuka muri RDC.

Abajijwe icyo biba bivuze kumva ubuyobozi bwa Congo budahwema gutunga agatoki u Rwanda ko ari rwo nyirabayazana w’ibibazo ifite, nyamara byakomera ugasanga u Rwanda rubaye ahantu hari umutekano bamwe mu baturage ba Congo bahungira, rukabakira neza rutitaye kuri ibyo byose, yavuze ko u Rwanda rufite umuco wo gutabara abari mu kaga, ariko kandi hakaba hari n’amasezerano mpuzamahanga ruba rwarasinye rugomba kubahiriza.

Yagize ati, “Icyo bivuze ni uko u Rwanda, amasezerano rwagiye rushyiraho umukono, yaba ari hagati yarwo n’ibindi bihugu, yaba ari hagati y’u Rwanda n’Umuryango mpuzamahanga, yaba ay’Afurika yunze Ubumwe, yaba ay’Umuryango w’Umwe bw’u Burayi, rwo rugomba kubahiriza ayo masezerano no kuyashyira mu bikorwa, noneho kandi u Rwanda rugomba gutabara rutarebye ngo uyu ni iki, ni ubuhe bwoko,ni uw’ikihe gihugu,ni uwo mu wuhe muryango mpuzamahanga. Ibyo ni ibintu uretse no kuba biri mu muco wacu, ni n’ibintu twasinye nk’amasezerano. Ntabwo rero wagendera kuba wavuga uti uyu muntu ntanyumva, ejo yaza ari mu kaga, ukamubwira uti, n’ubundi ntunyumva ni akazi kawe….”

Yavuze ko abo abasirikare ba RDC bahungiye mu Rwanda, binashoboka ko ari bo bari bahoze barasa mu Rwanda mu gitondo, ariko byagera ku manywa bagashyira intwaro hasi bakaza mu Rwanda, rukabakira kandi neza kubera uwo muco, uburere ndetse n’amasezerano mpuzamahanga rwasinye.