Lt. Col. Willy Ngoma ijwi rikomeye rya M23: Inzira y'ubuzima n'urugendo rwe rwa Gisirikare.

Lt. Col. Willy Ngoma ni umwe mu bantu bazwi cyane mu karere k’Ibiyaga Bigari, by’umwihariko mu burasirazuba bwa Repubulika Iharanira Demokarasi ya Congo (RDC). Uyu musirikare ni umuvugizi wa M23 ku rwego rwa gisirikare, umutwe w’inyeshyamba umaze igihe kinini uhagaze nk’umwe mu mitwe yitwaje intwaro ifite imbaraga zidasazwe muri Kivu y’Amajyaruguru.

Muri iyi nkuru, turagaruka ku mateka ye, uko yinjiye mu gisirikare, uko yageze ku mwanya afite muri M23, ndetse n’ingaruka ibihano mpuzamahanga byamugiraho.

Lt. Col. Willy Ngoma yavukiye i Kiningi, mu majyaruguru y’u Rwanda, mu mwaka wa 1974. Yavukiye mu muryango w’abana barindwi, akaba yari umwana wa gatatu. Se yari umukozi wa Leta naho nyina yari umubyeyi wita ku rugo.

Ubuzima bwe bwahindutse cyane mu 1986 ubwo se yapfaga. Muri icyo gihe, Ngoma wari ufite imyaka 12, yajyanywe n’umwe mu bo mu muryango we wari utuye i Kiwanja, muri Kivu y’Amajyaruguru muri RDC.

Amashuri ye n’itangira ry’ubuzima bw’igisirikare

Ngoma yize amashuri abanza mu kigo cya Camp Ebeya i Mbanza-Ngungu, aho yakundaga kwitwa "Pap" mu bandi banyeshuri. Nyuma yaho, yakomereje amashuri yisumbuye mu bijyanye n’imibereho rusange (Social) ndetse akomereza mu mashuri makuru muri ISP/Mbanza-Ngungu aho yigaga amateka.

Nyuma yo kurangiza amashuri, yabaye umwarimu w’amateka n’ubumenyi bw’isi (geography). Ariko, ubucuti yari afitanye n’abasirikare bamwe baje gushinga umutwe wa M23 bwatumye azamuka mu buryo butandukanye mu gisirikare.

Inzira ye muri M23

Willy Ngoma yinjiye mu gisirikare mu mwaka wa 2012 ubwo umutwe wa M23 wari umaze kuvuka. Yari umusirikare wa Sultani Makenga, umwe mu bayobozi bakomeye b’uyu mutwe.

Mu bihe bya mbere, yagaragaye cyane nk’umwe mu barwanyi bafite imyitozo idasazwe, bikaba byaratewe n’uko yari afite ubumenyi mu mateka n’igisirikare. Uko iminsi yagiye ishira, yazamuwe mu ntera, kugeza ubwo yagizwe umuvugizi wa M23 mu rwego rwa gisirikare.

Kuzamurwa mu Ntera

Mu ntangiriro za 2024, Willy Ngoma yazamuwe ku ipeti rya Lieutenant Colonel, ndetse ahabwa inshingano zikomeye zo gukomeza guhangana n’igitutu cy’igisirikare cya Leta ya RDC, FARDC, ndetse n’abasirikare b’Ubumwe bwa Afurika bari mu bikorwa byo kurwanya umutwe wa M23.

Uyu mwanya watumye agaragara cyane mu itangazamakuru, atanga amakuru ku bikorwa bya M23, agaragaza ko uyu mutwe urimo guharanira uburenganzira bw’Abanyekongo bavuga Ikinyarwanda. 

Ibihano Mpuzamahanga

Nyuma yo kuzamurwa mu ntera, Akanama k’Umuryango w’Abibumbye gashinzwe umutekano kamufatiye ibihano. Ibi byatewe n’uko yashinjwe kugira uruhare mu bikorwa by’ihohotera n’ibyaha by’intambara mu burasirazuba bwa RDC.

Ibihano yafatiwe byari bifite ingaruka zikomeye, harimo guhagarikirwa umutungo we wose waba uri ku butaka bw’ibihugu bikomeye nk’Amerika, u Burayi, ndetse no gukumirwa mu ngendo mpuzamahanga.

Ubuzima bwe bwite

Willy Ngoma  ni umugabo ufite umugore n’abana bane. Kubera inshingano ze mu gisirikare, ubuzima bwe bwite ntibwamenyekanye cyane mu itangazamakuru, ariko azwiho gukunda umuryango we no kugira uruhare rufatika mu burere bw’abana be.

M23 ikomeje ibikorwa byayo, kandi Willy Ngoma akomeje kugaragara mu itangazamakuru nk’ijwi rikomeye ry’uyu mutwe. Ariko, kubera ibihano mpuzamahanga, hari impungenge ko bishobora kugabanya imbaraga ze mu buvugizi.