M23 irakurikizaho iki nyuma yo gufata no kugenzura umujyi wa Goma muri DRC.

Nyuma y’iminsi ibiri y’intambara ikaze, umutwe wa Mouvement du 23 Mars (M23) watangaje ko wafashe umujyi wa Goma, umwe mu mijyi minini yo mu burasirazuba bwa Repubulika Iharanira Demokarasi ya Congo (RDC).

Iki gikorwa cyahinduye isura y’intambara muri aka gace, bitera impungenge abasesenguzi ku hazaza h’umutekano w’akarere.

Oscar Balinda, umuvugizi wa M23 mu bya politiki, yadusobanuriye intego y’uyu mutwe, uko bateganya gucunga Goma, ndetse n’imibanire yabo na Leta ya Congo.

Impamvu M23 yafashe Goma

Oscar Balinda yatangaje ko intego y’iki gikorwa ari uguhagarika ihohoterwa rikorerwa abaturage bo mu burasirazuba bwa Congo, cyane cyane Abanyekongo bavuga Ikinyarwanda.

Yagize ati “Ni gakondo yacu, nta muntu ufite uburenganzira bwo kudukura kuri gakondo yacu. Ubu rero twagarutse turi iwacu, abaturage baratwishimiye cyane.”

Balinda avuga ko mu nzira baganaga i Goma bahuye n’abaturage benshi babaha ikaze, babasaba kubarokora.

Umujyi wa Goma ugiye gutegekwa na M23?

Kuva M23 yafata Goma, ibikorwa remezo byasenyutse, hari ibisasu bikirunze mu bice bitandukanye, kandi bamwe mu baturage barahunze. Balinda avuga ko ubu bari gukora ibishoboka byose kugira ngo ubuzima busubire mu buryo.

Ati “Turi gushyira imbaraga mu gusana ibikorwa remezo, gusubiza abaturage mu ngo zabo, kugarura amashanyarazi n’amazi, no gutuma amashuri n’ibitaro bikomeza gukora.”

Uyu mutwe uvuga ko ugiye gushyiraho inzego z’ubuyobozi muri Goma, nk'uko wabigenje mu yindi mijyi wafashe.

Ati “Abaturage bakeneye abayobozi, kugira ngo bashobore gusubira mu buzima busanzwe. Tuzashyiraho abayobozi b’inzego z’ibanze bashinzwe ibitaro, amashuri, ubucuruzi n’ibindi.”

Baraguma i Goma cyangwa barakomeza?

Ku bijyanye n'icyo bateganya nyuma yo gufata Goma, Balinda yavuze ko M23 idateganya kugaba ibitero mu yindi mijyi, ariko ko bazakomeza kwirwanaho no kurinda abaturage.

Ati “Aho umwanzi azaba ahemukira abaturage, tuzagenda tubarengera nk'uko twabikoze hano.” 

Ese ibiganiro na Leta ya Congo birashoboka?

M23 yemeza ko idafunze imiryango y’ibiganiro, ariko ko Leta ya Congo ari yo ifite ijambo rya nyuma.

Ati “Amaboko yacu arafunguye ku biganiro. Igihe cyose Leta ya Congo yiteguye kuganira, natwe turi tayari.”

Ikindi cyihutirwa kuri M23 ni ugucyura impunzi, cyane cyane abo muri Goma bahunze intambara. Ati  “Dufite gahunda yo gukura ibisasu mu duce twinshi kugira ngo abaturage bagaruke mu ngo zabo batikanga ibiturika.”

Ese ubutegetsi bwa M23 buzamara igihe kingana iki muri Goma?

Nubwo M23 yemeza ko yiteguye kuyobora Goma no kugarura amahoro, hari impungenge ku buryo ubutegetsi bw’uyu mutwe buzagenda. Abasesenguzi bavuga ko hakenewe imishyikirano na Leta ya Congo kugira ngo hamenyekane niba uyu mutwe ushobora kuyobora aka gace mu buryo burambye.

Ku rundi ruhande, hari n’abagaragaza impungenge z'ingaruka ibi bishobora kugira ku mutekano w’akarere, cyane cyane ku mubano wa RDC n’ibihugu bituranyi nk’u Rwanda na Uganda, bikunze gushinjwa gufasha M23, nubwo byo bihakana ibyo birego.

Gufata Goma na M23 ni igikorwa cyahinduye isura y’intambara yo mu burasirazuba bwa Congo. Nubwo uyu mutwe uvuga ko uzagarura amahoro n’ituze mu mujyi, haribazwa niba uzabasha kuwugumana, cyangwa niba Leta ya Congo izongera kuwubasubiza.