RDC ntizigera ipfukamira M23: Lukonde yahamije ko igihugu cye gihagaze bwuma mu mutekano

Perezida wa Sena ya Repubulika ya Demokarasi ya Congo (RDC), Jean-Michel Sama Lukonde, yahamije ko igihugu cye gihagaze bwuma mu kurinda ubusugire bwacyo no guhangana n'abarwanyi ba M23, ashimangira ko batazigera bapfukamira umwanzi.

Ibi yabitangaje ubwo yatangizaga igihembwe cya Werurwe cy’Inteko Ishinga Amategeko ya RDC, aho yagaragaje ko nubwo igihugu cye cyemera ibiganiro by’ubuhuza bya Nairobi na Luanda, hari imirongo ntarengwa igomba kubahirizwa.

Amasezerano ya Nairobi n’aya Luanda

Sama Lukonde yavuze ko amasezerano ya Nairobi, yari agamije kwambura intwaro imitwe yitwaje intwaro irenga 200 no guharanira umutekano w’Abanye-Congo bavuga Ikinyarwanda, yananiwe gushyirwa mu bikorwa uko bikwiye. Yashimangiye ko amasezerano ya Luanda, ayobowe na Perezida wa Angola João Lourenço, ari yo akiriho kandi agomba gukurikizwa.

Mu kwezi kwa Nzeri 2024, Perezida Félix Tshisekedi yari yatangaje ko amasezerano ya Nairobi yateshejwe agaciro kubera ko Perezida wa Kenya William Ruto yafashe uruhande rw’u Rwanda, bityo RDC ikagendera ku masezerano ya Luanda nk’uburyo bwo kugera ku mahoro mu burasirazuba bw’igihugu.

Intambara na M23: RDC ntizigera igaruka inyuma

Mu ijambo rye, Sama Lukonde yagaragaje ko Leta ya RDC idashobora kwihanganira igikorwa icyo ari cyo cyose cyo kuvogera imipaka y’igihugu cyangwa kwigarurira ubutaka bwayo, avuga ko M23 igomba gusubira aho yateye iturutse.

Yagize ati: “Ntituzigera tuganira ku busugire bw’ubutaka bw’igihugu cyacu. Abanzi bacu nibamenye ko RDC itazigera icika intege cyangwa ngo isubire inyuma na rimwe ku rugamba rwayo.”

Yanashinje bimwe mu bihugu ndetse n’imiryango mpuzamahanga gufasha imitwe yitwaje intwaro mu gusahura umutungo kamere wa RDC, asaba Umuryango w’Abibumbye gukurikirana ishyirwa mu bikorwa ry’ingingo ya 2773 y’Inama y’Umutekano ya Loni, igamije guhagarika intambara n’ivanwaho ry’imitwe yitwaje intwaro.

Imirwano irakomeje, ibiganiro na M23 i Luanda

Aya magambo akomeye ya Sama Lukonde aje mu gihe M23 yigaruriye ibice birimo Nyabiondo na Walikale mu Ntara ya Kivu y’Amajyaruguru n’Amajyepfo.

Mu gihe kandi kuri 17 Werurwe 2025, Abaminisitiri b’Ububanyi n’Amahanga ba SADC na EAC bari gusuzuma raporo y’ingabo ku guhagarika imirwano, hateganyijwe ibiganiro hagati ya Leta ya RDC na M23 bizabera i Luanda ku wa 18 Werurwe, binyuze mu buhuza bwa Angola.

Tina Salama, umuvugizi wa Perezida Tshisekedi, yemeje ko Leta ya RDC izitabira ibi biganiro ariko yirinze gutangaza amazina y’abagize itsinda rizoherezwa i Luanda.

RDC yiteguye iki?

Mu gihe umwuka w’intambara ukomeje gukaza umurego, RDC ikomeje gukorana n’amahanga mu gushaka ibisubizo by’amahoro mu burasirazuba bw’igihugu. Gusa, uburyo M23 izavangwa mu gisirikare cya RDC cyangwa ikagarurwa mu buzima busanzwe bigomba gukorwa binyuze mu mategeko, nk'uko biteganywa n'amasezerano ya Luanda.