Police VC yatunguye APR VC

Mu gihe imikino ya nyuma ya kamarampaka (Finals) yatangiraga ku wa Gatandatu, ikipe ya Police VC yatunguye APR VC iyiysinda amaseti 3-0, mu mukino wari witabiriwe bidasanzwe.

Ni umukino wa mbere muri itatu aya makipe yombi agomba gutanguranwa, aho Police VC isa n’iyateye intambwe iyerekeza ku gikombe, dore isabwa gutsinda umukino umwe gusa ubundi ikacyegukana.

Nk’uko ingengabihe ibigaragaza, umukino wa kabiri kuri aya makipe yombi, uzaba tariki ya 10 Gicurasi kuko amwe mu makipe yo mu Rwanda agiye kwitabira imikino mpuzamahanga ihuza amakipe yabaye ayambere iwayo (CAVB Club Championship), aho abagore bazajya muri Nigeria naho abagabo bo bakajya mu gihugu cya Libya.

APR VC ibitse igikombe cya shampiyona, yatunguwe bikomeye kuko mu mukino waherukaga guhuza aya makipe, ikipe ya APR yatsinze Police amaseti 3-1, inatwara igikombe mu gihugu cya Uganda mu irushanwa ry’akarere ka Gatanu.

Police VC ni ubwa mbere irimo gukina imikino ya nyuma (Finals) mu myaka 3 imaze ishinzwe, mu mwaka wayo wa mbere, yegukanye umwanya wa gatatu, mu mwaka wayo wa kabiri, yasoreje ku mwanya wa kane naho ubu ikaba irimo gukina imikino ya nyuma ku nshuro yayo ya mbere.

Ikipe ya Police VC ntabwo yo izitabira imikino nyafurika yavuzwe hejuru kuko itigeze ibona itike yo kuyikina. Biteganyijwe ko APR izahaguruka mu Rwanda taliki ya 17 Mata yerekeza muri Libya.

Mu mukino wo guhatanira umwanya wa gatatu, ikipe ya Kepler VC yongeye gutsindwa nanone, aho yatsinzwe na REG VC amaseti 3-2 mu mukino wakijijwe na kamarampaka dore ko bakinnye amaseti 5.

Nkuko twabigarutseho hejuru, imikino ya kabiri yose izakinwa muri Gicurasi yaba abagabo n’abagore.

Biteganyijwe amakipe y’abagore ya APR ndetse na Police ahaguruka kuri uyu wa kabiri yerekeza mu gihugu cya Nigeria mu mikino ya CAVB Club Championship.