Perezida Macron, yasabye ibiganiro byo mu rwego rwo hejuru hejuru hagati y’u Rwanda na RDC.

Perezida Emmanuel Macron w’u Bufaransa, yasabye ko hasubukurwa ibiganiro byo mu rwego rwo hejuru hagati y’u Rwanda na Repubulika Iharanira Demokarasi ya Congo, mu rwego rwo gukemura ikibazo cy’umutwe wa M23.

Macron yabitangaje ku wa Kane tariki ya 16 Mutarama, ubwo we na mugenzi we João Lourenço wa Angola wari wasuye u Bufaransa baganiraga n’abanyamakuru.

Perezida Lourenço asanzwe ari umuhuza mu bibazo bya Politiki biri hagati ya RDC n’u Rwanda.

Uruzinduko rw’iminsi ibiri yagiriye i Paris rwaje nyuma y’ukwezi kumwe inama yagombaga guhurizamo ba Perezida Paul Kagame na Félix Antoine Tshisekedi isubitswe ku munota wa nyuma, ku mpamvu Kigali ivuga ko zatewe na Kinshasa yisubiriye ku munota wa nyuma ku cyemezo cyayo cyo kujya mu mishyikirano na M23.

Kuri ubu imirwano ikomeye irimo kujya mbere hagati ya M23 n’Ihuriro ry’Ingabo za Leta ya RDC mu bice bitandukanye by’Intara y’Amajyaruguru.

Macron yagaragaje ko hakenewe ibiganiro byo mu rwego rwo mu gukemura ikibazo cy’uriya mutwe.

Ati “Ibyihutirwa mu karere k’ibiyaga bigari bigomba kujyana n’ibiganiro, ndetse no gushaka amahoro arambye hanubahwa ubusugire bwa RDC . Turasaba isubukurwa ry’ibiganiro byo ku rwego rwo hejuru.”

Macron kandi yasabye impande zihanganye mu mirwano gutanga agahenge.

Perezida João Lourenço yavuze ko igihugu cye gikomeje gukora inshingano zacyo nk’umuhuza, mu rwego rwo “kugerageza gushyira iherezo” ku makimbirane amaze igihe hagati ya Congo n’u Rwanda.