Nyabihu: Inkongi y'umuriro idasanzwe yatwitse amaduka 8 arashya arakongoka.

Mu karere ka Nyabihu,umurenge wa Bigogwe akagari ka Rega habereye impanuka y'inkongi y'umuriro yatwitse amaduka 8 y'ubucuruzi muri iki gitondo.

Umunyamabanga Nshingwabikorwa w'akagari ka Rega Maniragaba Eric yaganiriye n'Ikinyamakuru Ijambo.net yemeza iby'iyi nkongi  y’umuriro.

Iyi nkongi yatangiye ahagana i saa kumi n'ebyiri n'Iminota mirongo ine zo kuri uyu wa 22 Ukwakira 2024 itewe n'umuryango umwe w’inzu wari ufite ikibazo cya Installation y’amashanyarazi.

Yavuze ko mu gitondo basanze inzu zafashwe n'umuriro ati "Amakuru dufite nuko umuryango umwe wari ufite ibibazo bya Installation, rero yafashwe ihita ikongeza indi miryango 8, yose irashya irakongoka, imodoka zizimya inkongi imwe uvuye Rubavu indi uvuye Musanze zahahuriye zitabaye, kugira ngo n'andi maduka y'ubucuruzi adafatwa n'umuriro."

Eric akomeza  avuga ko kugeza ubu bakibarura ngo barebe umubare w'ibyangiritse ariko amaduka ane y'uwitwa Hibukande Jean yahiye cyane aho harimo ibicuruzwa bitandukanye birimo inyongeramusaruro,imiti yica udukoko mu myaka n'ibindi bitandukanye.

Maniragaba Eric yaboneyeho no gushimira ubuyobozi bwa Polisi bwatabaye bukazana kizimyamoto ndetse n'abaturage babaye hafi bakazimya uko bashoboye, asaba n'abangirijwe ibicuruzwa n'inkongi y’umuriro kwihangana.

Mu karere ka Nyabihu inkongi z'umuriro ntabwo zari ziherutse kuhagaragara usibye mu turere bihana imbibi nka Musanze na Rubavu usanga hari ibikorwa byinshi by’ubucuruzi n’ikoreshwa rya gaze abaturage basabwa kwitondera.

Nsengimana Donatien.