Kwiyongera kw’ibicurane byatumye Abenshi bakeka ko ari Covid-19

Muri iyi minsi hakomeje kuvugwa indwara y’ibicurane ikomeje kwibasira abantu benshi mu bice bitandukanye by’igihugu bigatuma bamwe bakeka ko ari Covid-19 yaba yagarutse,ariko Abanyarwanda basabwe kudaha agaciro ayo makuru akwirakwizwa na bamwe kuko ari ibihuha.

Minisiteri y’ubuzima yatangaje ko muri uku kwezi kwa Mutarama havuzwe cyane kwiyongera kw’indwara zifata mu myanya y’ubuhumekero, RBC ivuga ko atari ubwambere ibyo bibaye kuko no mu myaka yashize muri ayo matariki hagaragaye icyo kibazo.

Julien Niyingabira Umuvugizi wa Minisiteri y’ubuzima yavuze ko abaturage bagomba kwirinda guha agaciro amakuru atangwa n’abantu batandukanye bavuga ko ibyo bicurane ari ubwoko bushya bwa Covid-19.

Ati”nibyo koko hari ibicurane byinshi mu baturage ariko bijyanye n’igihe turimo nkuko byagiye bigaragara mu myaka yashize rero nti twavuga ko ari Covid-19,niyo mpamvu abaturage bagomba kubifata nk’ibisanzwe ariko bakirinda kubyanduzanya bakoresha agapfukamunwa kuko katagenewe kurinda Covid-19 gusa.”

Imibare ya RBC igaragaza ko mu bipimo byafashwe ahantu hatandukanye byagaragayeko abagera kuri 17% bafite ubwo bwandu.

Julien Niyingabira avuga ko ntacyorezo cyiri mu gihugu kuko igihe byaba bigararageye ko hari icyorezo babimenyeshwa na Minisiteri y’ubuzima.