Ibyo wamenya ku mvune ya Kylian Mbappé wagiriye imvune mumukino wa Real Madrid na Atalanta.

Rutahizamu w'ikipe y'igihugu y'u Bufaransa na Real Madrid, Kylian Mbappé yagize ikibazo cy'imvune nyuma yo kwitwara neza atsinda igitego, gusa Carlo Ancelotti yatangaje ko iby'iyi mvune bidakanganye cyane.

Kuwa Kabiri ni bwo ikipe ya Atalanta yo mu Butaliyani yari yakiriye Real Madrid mu mukino wo ku munsi wa Gatandatu wa UEFA Champions League 2024-25.

Ubwo uyu mukino wari ugeze ku munota wa 10, Kylian Mbappé yatsinze igitego ku mupira yahawe na Brahim Diaz, gusa ku munota wa 36 aza gusimbuzwa Rodrigo kubera ko yari agize ikibazo cy'imvune.

Nyuma y'uyu mukino warangiye Real Madrid itsinze ibitego 3-2, umutoza wayl Carlo Ancelotti yabajijwe ikibazo cy'imvune ya Mbappé. Yavuze ko ikibazo yari yagize ari icyo mu mikaya ndetse avuga ko nubwo atarakorerwa isuzuma ariko bimeze nk'aho bidakomeye cyane.

Ati "Yari yarengeje urugero, ntabwo yari ameze neza mu mikaya ye. Tuzabibona neza mu minsi iri imbere. Ntabwo bisa nk'ibikomeye, ariko yagombaga guhagarika gukina kuko atashoboraga kwiruka... byamubabaje gato. Twahisemo rero kumukuramo".

Kylian Mbappé yavunitse amaze gutsinda igitego cye cya 50 muri UEFA Champions muri rusange ndetse kikaba icya 12 muri Real Madrid. Biteganyijwe ko uyu mukinnyi ashobora gusiba umukino umwe gusa Real Madrid izakinamo na Rayo Vallecano kuwa Gatandatu.