Fatakumavuta yabaye sakwe sakwe ku mbuga nkoranyambaga nyuma yuko Dr. Thierry amushyize ku karubanda.

Umuvugizi w’Urwego rw’Igihugu rw’Ubugenzacyaha, RIB, DR.Murangira B.Thierry yatangaje ko Fatakumavuta uheruka gutabwa muri yombi, bamupimye bagasanga anywa ikiyobyabwenge cy’urumogi ku kigero cyo hejuru.

Mu kiganiro Dr.Murangira yagiranye na RBA, yavuze ko bakimara gufunga Fatakumavuta, bamupimye bakamusangamo urumogi ruri ku kigero cya 298, mu gihe ikigero gisanzwe ari hagati ya 0-20.

yagize ati “Twaje kumupimisha ibiyobyabwenge dusanga akoresha urumogi, ibisubizo by’abahanga bigaragaza ko afite igipimo cya 298 mu gihe igipimo gisanzwe ari hagati ya 0 na 20.”

Dr.Murangira yavuze ko iki nacyo ari icyaha gihita kiyongera ku bindi yashinjwaga birimo kubuza amahwemo abantu hifashishijwe imbuga nkoranyambaga.

Birimo kandi gukoresha imvugo ziremereye zikurura amacakubiri mu bantu zigambiriye no kubashyamiranya.

Fatakumavuta, yatawe muri yombi nyuma yuko yakunze kugaragara mu biganiro atangira ku mbuga nkoranyambaga nka YouTube, akoresha amagambo akomeye kuri bamwe mu basanzwe bazwi mu myidagaduro.

Sengabo Jean Bosco uzwi nka Fatakumavuta acumbikiwe kuri Sitasiyo ya RIB ya Kimihurura.

Nsengimana Donatien.