CHAN 2024: Amavubi yatsinze Sudani y’Epfo ibitego 2-1 mu mukino wo kwishyura.

Ikipe y’igihugu y’u Rwanda, Amavubi, yatsinze Sudani y’Epfo ibitego 2-1 mu mukino wo kwishyura wabereye kuri Stade Amahoro, kuri uyu wa Gatandatu tariki ya 28 Ukuboza 2024, saa kumi n’ebyiri z’umugoroba.

Wari umukino wo kwishyura w’ijonjora rya kabiri ryo gushaka itike y’iyi mikino izabera muri Uganda,Tanzania na Kenya hagati ya tariki 1 na 28 Gashyantare 2024.

Nyuma y’umukino wa mbere wabereye muri Sudani y’Epfo mu cyumweru gishize Amavubi akahatsindirwa 3-2 yari ahanzwe amaso n’Abanyarwanda batari benshi bihambaye muri stade Amahoro ngo barebe ko yabona amanota atatu.

Amavubi yasabwaga gutsinda uyu mukino n’ikinyuranyo cy’ibitego byinshi agasigara ategereje kuba ikipe imwe muri ebyiri CAF izafata zizasimbura Tuniziya na Libya zikuye muri iri rushanwa.

Umukino watangiye Amavubi agaragaza ubushake bwo gutsinda, maze ku munota wa 34 Tuyisenge Arsène afungura amazamu ku ishoti rikomeye ryahinduriwe icyerekezo na Mugisha Didier. Gusa ku munota wa 45, Amavubi yabonye penaliti nyuma y’ikosa ryakorewe Niyomugabo Claude, ariko kapiteni Muhire Kevin ayitera umunyezamu wa Sudani y’Epfo, Juma Jenaro Awad, arayikuramo.

Mu gice cya kabiri, Amavubi yakomeje gusatira maze ku munota wa 55 Muhire Kevin yatsinda igitego cya kabiri ku mupira w’umutwe yahawe na myugariro wa Sudani y’Epfo. Gusa Sudani y’Epfo yaje kwihimura ku munota wa 81 itsinda igitego cya mbere cyabonetse ku ishoti rya David Sebith, bituma umukino urangira Amavubi atsinda ibitego 2-1.

Nubwo Amavubi yatsinze, ntabwo byari bihagije gukomeza mu irushanwa rya CHAN 2024.

Nubwo Amavubi yatsinze ariko mu mibare ndetse n’amabwiriza y’uburyo Akarere ka CECAFA kazatanga amakipe muri CHAN 2024 yasezerewe ubwo Sudani yatsindaga Ethiopia imikino ibiri (0-2,2-1) dore ko byahise bituma itike imwe yari isigaye muri aka karere havuyemo ibihugu bitatu bizakira ihita iyitwara.

Gutsinda imikino ibiri kwa Sudani, byari bivuze ko habazwe amanota, Amavubi yatsinzwe umukino ubanza adashobora kugeza ku manota atandatu kuko ubu rufite atatu.

Amahirwe asigaye atekerezwa ashakirwa mu kuba hari ibihugu byo muri Afurika y’Amajyarugu Libya na Tunisia byavuze ko bitazitabira dore ko Maroc yonyine aricyo gihugu cy’Abarabu kizitabira iri rushanwa,hakaba hasigaye kumenya uko bizasimbuzwa ariho u Rwanda rwabonera.