Agezweho ku rugamba rwa M23 na FARDC: Habaye gutungurana kwihuse kuri Walikale - Kakuku

Ingabo za Repubulika ya Demokarasi ya Congo (FARDC) zifatanyije n’inyeshyamba za Wazalendo bagabye igitero simusiga ku birindiro by’inyeshyamba za M23/AFC i Kakuku, agace gaherereye ku birometero bitandatu uvuye mu mujyi wa Walikale, ku muhanda werekeza i Mubi.

Nk'uko amakuru aturuka muri ako gace abivuga, urufaya rw’amasasu hagati y’impande zombi rwatangiye ku mugoroba wo ku Cyumweru, tariki ya 30 Werurwe 2025, imirwano ikagera kure ku buryo amasasu yumvikanaga kugeza no ku biro bya Teritwari ya Walikale.

Abatangabuhamya bavuga ko nyuma y’imirwano ikaze, abarwanyi ba Wazalendo basubiye inyuma mu gace kataramenyekana, mu gihe igice cyari cyatewe cyasigaye mu maboko ya M23. Ibi bikomeje gukoma mu nkokora imishinga y’amahoro muri Kivu y’Amajyaruguru, aho imiryango itegamiye kuri Leta n’imiryango mpuzamahanga ikomeje gutabaza ku bibazo by’uburenganzira bwa muntu.

Imirwano yo muri aka gace irushijeho guhangayikisha abaturage ba Walikale, aho benshi bamaze gucika intege nyuma y’amezi menshi y’intambara idashira, yahinduye ubuzima bwabo ubuhunzi n’ubukene bukabije. Abaturage batangiye kwerekeza mu bice byizewe nka Goma na Bukavu, bahunga ubwicanyi n’ubwoba bw’ibitero bishobora gukomeza.

Mu gihe FARDC n’abayobozi ba Wazalendo bataragira icyo batangaza ku byabaye, M23/AFC na yo iracyacecetse ku ngaruka z’iyo mirwano n’ingamba zayo. Gusa, abasesenguzi bemeza ko urugamba rukomeje gufata indi ntera, bigaragaza ko amahoro mu burasirazuba bwa Congo akomeje kuba inzozi zitagerwaho.

Biteganyijwe ko ubuyobozi bw’akarere n’imiryango yita ku burenganzira bwa muntu buzakomeza gukurikirana iby’iyi mirwano, mu gihe abaturage bo bakomeje kwibaza niba icyizere cy’amahoro kizongera kugaruka mu karere kabo.