Miliyoni 3 Frw zatumye ubuyobozi bw’ikipe ya Etincelles FC buhamagazwa muri RIB.

Ubuyobozi bw’ikipe ya Etincelles FC bugiye kwishyura Miliyoni 3Frw zatumye ihamagazwa kwitaba mu Rwego rw’Igihugu rw’Ubugenzacyaha (RIB), ku kirego cyatanzwe n’Akarere ka Rubavu.

Ubuyobozi bw’iyi kipe buvuga ko bwatunguwe no kuba Akarere karageze aho kagera muri RIB hejuru ya miliyoni 3Frw zonyine. Aya makuru avuga ko kuri uyu wa Gatatu nka Komite Nyobozi barara bishyuye aya mafaranga, hanyuma bakagirana ibiganiro n’ubuyobozi bw’Akarere ka Rubavu ku mikoranire ya bo.

Etincelles FC imaze igihe ivugwamo ibibazo by’amikoro make, ndetse muri uyu mwaka w’imikino abakinnyi bigeze guhagarika imyitozo kubera kudahembwa.

Akarere ka Rubavu ni umuterankunga mukuru wa Etincelles FC, kuko kayigenera Miliyoni 120 Frw buri mwaka ariko kuri ubu ubuyobozi bwa Etincelles FC buvuga ko kabahembera abakozi gusa ibindi bakirwanaho.

Nyuma y’imikino 13 imaze gukinwa muri Shampiyona, Etincelles FC iri ku mwanya wa 14 n’amanota 12, irusha amanota abiri Kiyovu Sports ya nyuma.