Real Madrid yatsinze Club Pachuca yo muri Mexique ihita itwara igikombe cya 9 mu mateka.

Ibitego 3 ku busa ni byo Real Madrid yatsinze Club Pachuca yo muri Mexique ihita yegukana igikombe mpuzamigabane cyakinwaga mu buryo bushya ku nshuro ya mbere.

Nubwo uyu mwaka iri rushanwa rizwi nka Intercontinental Cup ryakinwe mu buryo bushya, ariko rimaze igihe kinini kuko ryatangiye mu 1960.

Muri rusange ni umukino utagoye Real Madrid kuko yarushaga Pachuca bigaragara. Ku munota wa 37, Federico Valverde yacomekeye Jude Bellingham umupira mwiza nawe awutanga kwa Vinícius Junior wawuhinduye imbere y’izamu usanga Kylian Mbappé afungura amazamu.

Ku munota wa 53 ikipe ya Real Madrid ibifashijwemo na Rodrygo aho yazamukanye umupira acenga cyane atera ishoti ryiza ari hanze y’urubuga rw’amahina atsinda igitego cya kabiri.

Mu minota yakurikiye, umukino watuje ugabanya umuvuduko ari nako ukinirwa cyane mu kibuga hagati.

Ku munota wa 82, Vinícius yakiniwe nabi mu rubuga rw’amahina, umusifuzi yifashishije VAR atanga penaliti. Uyu Munya-Brésil yayinjije neza atsinda igitego cya gatatu cya Real Madrid.

Umukino warangiye Real Madrid yatsinze Club Pachuca ibitego 3-0 yegukana Intercontinental Cup ku nshuro ya cyenda mu mateka.

Muri iri rushanwa, Umugabane wa Afurika wari uhagarariwe na Al Ahly yo mu Misiri yesezerewe na Club Pachuca muri ½ kuri penaliti 6-5, nyuma yo kunganya ubusa ku busa.