Spice Diana yisobanuye ku byavuzwe ko atwite

Mu gihe inkuru z’abahanzikazi batwite zikomeje kuvugwa cyane, cyane cyane nyuma yo kubyara kwa Sheebah Karungi, umuhanzikazi Spice Diana yatangaje ko ataragera igihe cyo kwibaruka.

Mu kiganiro yagiranye n’itangazamakuru, uyu muhanzikazi ukomoka muri Uganda yavuze ko nubwo akunda abana, ubu ataritegura kubyara kuko yibanda ku muziki we.

Yagize ati “Mukomeze mutegereze, kuko ubu siniteguye. Gusa igihe nikigera nzabyara kuko nkunda abana.”

Spice Diana yagarutse ku kuba kubyara ari icyemezo bwite cy’umuntu, ashimangira ko bidakwiye kuba ikintu umuntu ahatirwa cyangwa ashinjwa.

Yongeyeho ati “Kubyara abana ni ubushake bw’umuntu kandi bikwiye gukorwa bivuye ku rukundo, ntibibe ibintu umuntu ahatirwa.’’

Uyu muhanzikazi kandi yahakanye ibihuha byavugaga ko atwite, avuga ko impinduka zigaragara ku mubiri we ari byo byateje ayo makuru atari yo.

Uyu mwanzuro wa Spice Diana wagarutsweho cyane, bamwe bashima ukwishyira ukizana kwe, mu gihe abandi bagaruka ku buryo abahanzikazi bakunze kwibazwaho cyane ku bijyanye no gutwita n’ubuzima bwabo bwite.