Phiona Nyamutoro: Uko yahindutse umushinga wa Eddy Kenzo mu Rukundo Rudasanzwe

Phiona Nyamutoro, Umunyamabanga wa Leta muri Minisiteri ishinzwe Ubucukuzi bw’Amabuye y’Agaciro muri Uganda, yatangaje uburyo yatunguwe no guhura na Eddy Kenzo, bikarangira abaye umugore we aho kuba umufatanyabikorwa nk'uko yari yabitekereje.

Mu kiganiro yagiranye na Next Radio, Nyamutoro yavuze ko Eddy Kenzo yamusabye guhura, avuga ko afite umushinga bakeneye kuganiraho. Nyamara, uko baganiraga, byaje kugaragara ko uwo mushinga atari umushinga usanzwe, ahubwo yari we ubwe.

Uko byatangiye

Phiona Nyamutoro yemeje ko ubwo yahuye bwa mbere na Eddy Kenzo, uyu muhanzi yamusabye ubufasha mu rugendo rwo kwiyamamaza nk’Umudepite uhagarariye urubyiruko mu Nteko Ishinga Amategeko.

Yagize ati "Ntekereza ko afite umushinga runaka, sinari nzi ko ari njyewe wari uwo mushinga.” Yanagaragaje uko ibyari ibiganiro bya politiki byahindutse inkuru y’urukundo.

Mu biganiro byabo, Phiona yavuze ko yari yiteguye gutanga ibitekerezo bye byimbitse, ndetse yari yakoze ubushakashatsi bwinshi kugira ngo afashe Kenzo mu mishinga ye. Ariko, mu gihe yamusobanuriraga ibyo yari yateguye, Kenzo ntiyari amwitayeho cyane ahubwo akomeza gukoresha telefone ye.

Yagize ati "Ndamubwira ngo niba atakunze ibitekerezo ndimo kumubwira abivuge, mfite ibindi byinshi byo gukora."

Isezerano Ridasanzwe

Nyuma y’icyo kiganiro, Eddy Kenzo yahise asobanurira Phiona Nyamutoro ko impamvu atamwumvaga atari uko atishimiye ibyo yavugaga, ahubwo ari uko yashakaga kumubwira ikintu gikomeye.

Yagize ati "Ndamubwira nti ntakibazo, ni ikihe gitekerezo ufite? Yahise ambwira ngo ndashaka kukugira umugore."

Nyamutoro avuga ko yatunguwe no kumva ayo magambo, maze ariseka, yibaza niba ari we ubwiwe. Ibyari ibiganiro bya politiki byahindutse isezerano ridasanzwe ryo kubana.

Urukundo rwabo rwaje kujya ahagaragara mu 2024, ubwo bagiye baboneka kenshi bari kumwe, ndetse Kenzo amuherekeza mu muhango wo kurahirira inshingano ze nk’Umunyamabanga wa Leta. Muri Kamena 2024, uyu muhanzi yasabye anakwa Nyamutoro mu birori byabereye mu ibanga rikomeye.

Gusanga urukundo mu mushinga 

Inkuru y'urukundo rwa Eddy Kenzo na Phiona Nyamutoro ni imwe mu zigaragaza uburyo imishinga ishobora gutanga ibyiza bitari byitezwe. Ubwo Nyamutoro yatekerezaga ko agiye kunganira Kenzo mu rugendo rwa politiki, yaje kwisanga ari we mushinga nyamukuru.