Tiger Woods yahishuye ko ari mu rukundo n’uwahoze ari umugore wa Donald Trump Jr

Umunyabigwi mu mukino wa Golf, Tiger Woods, yatangaje ku mugaragaro ko ari mu rukundo na Vanessa Trump, wahoze ari umugore wa Donald Trump Jr., umuhungu wa Perezida wa Leta Zunze Ubumwe za Amerika, Donald Trump. Ibi yabinyujije ku mbuga nkoranyambaga ze, asangiza abamukurikira amafoto abiri ari kumwe na Vanessa, yandikaho ati: "Urukundo ruri mu kirere kandi ubuzima burushaho kuba bwiza uri iruhande rwanjye! Turategereje urugendo rwacu mu buzima turi kumwe."

Nk'uko byatangajwe na Reuters, Vanessa Trump, w'imyaka 47, yashakanye na Donald Trump Jr. kuva mu 2005 kugeza mu 2018, bakaba bafitanye abana batanu. Tiger Woods, w'imyaka 49, yahoze ari umugabo wa Elin Nordegren, bakaba baratandukanye mu 2010 nyuma y'ibibazo by'ubudahemuka. Woods afite abana babiri muri uwo mubano.

Page Six yo yatangaje ko Woods na Vanessa bahuriye ku bikorwa by'abana babo, aho abana babo biga ku ishuri rimwe, The Benjamin School, muri Palm Beach, Florida. Vanessa yagaragaye ari kumwe na Woods mu birori bya Golf, aho abana babo bitabiriye amarushanwa atandukanye.

Nubwo urukundo rwabo rushya rwashimishije benshi, byatumye habaho impaka mu bakunzi ba siporo n'abandi bantu bazwi. Woods yasabye ko ubuzima bwabo bwite bwubahirizwa, ati: "Muri iki gihe twifuza ko ubuzima bw'abakundwa bacu bwahabwa umwanya."

Iyi nkuru y'urukundo rushya rwa Tiger Woods na Vanessa Trump ikomeje kuvugwa cyane mu bitangazamakuru bitandukanye, aho benshi bategereje kureba uko uru rugendo rushya ruzagenda.