Perezida Tshisekedi yanze kwitabira inama idasanzwe ya EAC ku bibazo by’umutekano muri Congo.

Perezida Félix Tshisekedi wa Repubulika Iharanira Demokarasi ya Congo (DRC) yanzuye kutitabira inama idasanzwe y’Abakuru b’Ibihugu bigize Umuryango wa Afurika y’Iburasirazuba (EAC), iterana kuri uyu wa Kabiri, tariki 28 Mutarama 2025.

Iyo nama yibanda ku bibazo bikomeye by’umutekano bimaze igihe byugarije uburasirazuba bwa Congo.

Tina Salama, Umuvugizi wa Perezida Tshisekedi, yavuze ko icyemezo cyo kudahagararira igihugu muri iyi nama gishingiye ku buryo ibintu byifashe muri iki gihe.

Yagize ati: “Ni ibintu byigaragaza bitewe n’uko ibintu byifashe ubu, Perezida ntabwo azitabira iyi nama.” Ni ku nshuro ya gatatu Perezida Tshisekedi asiba inama nk’iyi, nubwo ireba by’umwihariko ikibazo cy’umutekano mu gihugu cye.

Iyi nama yatangijwe na Perezida wa Kenya, William Ruto, unayoboye uyu muryango muri iki gihe. Ni nyuma y’uko Ruto yavuganye kuri telefone na Perezida Paul Kagame w’u Rwanda ndetse na Tshisekedi ubwe, mu rwego rwo gushakira umuti ibibazo bikomeje gukaza umurego muri DRC.

Nubwo Tshisekedi adahari, ubuyobozi bwa Congo bukomeje gushyigikira ibiganiro by’i Nairobi byahurije hamwe Guverinoma ya DRC n’imitwe yitwaje intwaro, uretse umutwe wa M23 wakuwe mu biganiro.

Ibibazo by’umutekano mu burasirazuba bwa Congo byarushijeho gufata indi ntera, aho umutwe wa M23 wiyitiriye umujyi wa Goma, nubwo hakomeje kumvikana intambara muri uwo mujyi.

Perezida Ruto yavuze ko ibibazo muri Congo bikomeje guhungabanya akarere kose, akaba ari yo mpamvu iyi nama ifatwa nk’urufunguzo rwo kugerageza kugarura ituze.