Perezida Kagame yakiriye Umunyamabanga Mukuru wa OIF, Louise Mushikiwabo.

Perezida Paul Kagame, ku mugoroba wo kuri uyu  wa Gatatu tariki 08 Mutarama 2025, yakiriye mu biro bye, Umunyamabanga Mukuru w’Umuryango w’Ibihugu bikoresha Igifaransa (OIF), Louise Mushikiwabo.

Amakuru aturuka mu biro bya Perezida avuga ko “Bombi baganiriye ku ngingo zitandukanye zishingiye ku bufatanye busanzwe hagati y’u Rwanda n’uyu muryango wa OIF .”

Mu mwaka wa 2022, Louise Mushikiwabo yongeye gutorerwa kuba Umunyamabanga mukuru w’Umuryango w’Ibihugu bivuga ururimi rw’Igifaransa (OIF), umwanya yari asanzweho, akaba yari arangije manda ya mbere y’imyaka ine.

Kuva u Rwanda rwaba umunyamuryango wa OIF guhera mu 1970, impande zombi zifatanya mu mishinga yo guteza imbere inzego zitandukanye nk’uburezi, ubuzima, ubukungu, imibereho myiza y’abaturage n’ibindi.

Mushikiwabo uyoboye OIF yakoze inshingano zitandukanye muri Guverinoma y’u Rwanda zirimo kuba Minisitiri w’Ububanyi n’Amahanga n’Ubutwererane kuva 2009 kugeza 2018, aba Umuvugizi wa Guverinoma ndetse yabanje kuba Minisitiri w’itangazamakuru.