Ubuyobozi bwa Kiyovu Sports bwemeje Lomami Marcel nk’umutoza Mukuru.

Ubuyobozi bwa Kiyovu Sports, bwemeje ko Lomami Marcel ari we mutoza mukuru wa yo, usimbuye Bipfubusa Joslin watandukanye n’iyi kipe umwaka ushize.

Lomami yahawe amasezerano yo gutoza Kiyovu Sports imikino yo kwishyura muri uyu mwaka w’imikino 2024/2025.

Iyi kipe ya Kiyovu Sports ibicishije ku rubuga rwa yo (Website) yatangaje ko azaba yungirijwe na Malick Wade ari nawe waruri kuyitoza muri iyi minsi.

Uretse aba batoza kandi, umutoza ushinzwe kongerera ingufu abakinnyi, azakomeza kuba Sebarera Ayubu, mu gihe umutoza w’abazamu ari Nduwimana Pascal.

Marcel ategerejwe n’akazi gakomeye ko gufasha iyi kipe kuva mu makipe ahatanira kutajya mu Cyiciro cya kabiri, cyane ko yatangiranye ibibazo birimo kubura abakinnyi batandukanye kandi bakomeye.

Lomami Marcel w’imyaka 39, yakinnye mu makipe nka AS Kigali, Rayon Sports na Kiyovu Sports.

Yabaye kandi umutoza mu makipe nka Rayon Sports, Gasogi United, Gorilla FC na Espoir.

Umukino we wa mbere azahura na Vision FC ku cyumweru tariki 22 Ukuboza 2024 mu mukino w’umunsi wa 14 wa shampiyona.

Iyi kipe yo ku Mumena, iri ku mwanya wa 15 mu makipe 16 n’amanota 12 mu mikino 15 ya shampiyona y’u Rwanda imaze gukina.