Perezida Kagame yafunguye ku mugaragaro  Zaria Court Kigali

Perezida wa Repubulika Paul Kagame ari kumwe na Masai Ujiri, yafunguye ku mugaragaro Icyanya cy’ibikorwaremezo bya Siporo, Imyidagaduro n’Umuco kizwi nka Zaria Court Kigali.

Ni umushinga wutangijwe na Masai Ujiri, akaba ari nawe washinze Umuryango Giants of Africa, akaba yaramamaye muri Shampiyona ya Basketball muri Amerika (NBA) aho yabaye Perezida wa Toronto Raptors.

Mu bitabiriye iki gikorwa harimo kandi Minisitiri wa Siporo, Nelly Mukazayire n’Umuyobozi Mukuru wa Zaria Group, Andrew Feinsten.

“Zaria Court Kigali” ni inyubako igizwe n’ibice bitandukanye birimo hoteli ifite ibyumba 80, za restaurants, aho gufatira amafunguro n’ibinyobwa , gym na studio y’ibiganiro.

Hari kandi ikibuga kiberamo imikino itandukanye, iserukiramuco, ibitaramo, isoko n’ibindi bikorwa. Irimo kandi iguriro rinini rizafasha abayituriye kubona ibyo bakeneye, kimwe n’abashyitsi.

Imirimo yo kubaka Zaria Court yatangiye muri Kanama 2023, ikaba yaruzuye itwaye miliyoni 25$ asaga miliyari 36 mu mafaranga y’u Rwanda.

Zaria Court Kigali izafasha guteza imbere siporo, imyidagaduro n’ubukerarugendo, ndetse no kongera amahirwe y’akazi ku rubyiruko. Ni umushinga uzazamura isura ya Kigali nk’umujyi w’icyitegererezo ku rwego mpuzamahanga.