Perezida Kagame na João Lourenço baganiriye ku bibazo by’umutekano muke muri RDC.

Perezida wa Repubulika y’u Rwanda, Paul Kagame, yatangaje ko yagiranye ibiganiro na mugenzi we wa Angola, João Lourenço, byabaye mu ijoro ryo ku wa 30 rishyira 31 Mutarama 2025.

Ibi biganiro byibanze ku kibazo cy’umutekano muke mu Burasirazuba bwa Repubulika Iharanira Demokarasi ya Congo (RDC).

Perezida João Lourenço asanzwe ari umuhuza mu bibazo by’umutekano muke bimaze igihe muri ako karere. Mu butumwa yanyujije ku mbuga nkoranyambaga, Perezida Kagame yavuze ko ibiganiro byabo byagarutse ku gushaka ibisubizo birambye ku kibazo cya RDC.

Ati  “Twaganiriye ku bibazo by’umutekano mu karere n’uburyo twakorana n’abandi bayobozi b’Afurika mu gushaka ibisubizo binyuze mu gusigasira umubano n’imikoranire isanzwe.”

Uyu mubano ukomeje gukomera cyane cyane nyuma y'uko umutwe wa M23, uhuriyemo n’ihuriro AFC, ufashe umujyi wa Goma muri RDC mu mirwano ikaze. Ibi byateje impagarara mu karere, aho bimwe mu bihugu bya Afurika ndetse n’ibihugu byo hanze y’uyu mugabane bikomeje gushinja u Rwanda gushyigikira M23, nubwo rwo rwakomeje guhakana ibyo birego.

Mu nama y’Abakuru b’Ibihugu bigize Umuryango wa Afurika y’Iburasirazuba (EAC) iherutse kuba, Perezida Kagame yagaragaje ko hari ibihugu bimwe na bimwe bitavuga ku mugaragaro ku kibazo cya RDC kubera inyungu bifitemo.

Yagarutse kandi ku ngabo zimwe na zimwe z’ibihugu bya EAC, zoherejwe muri RDC, ariko zigafatanya n’imitwe yitwaje intwaro nka FDLR, igizwe n’abasize bakoze Jenoside yakorewe Abatutsi mu 1994.

Uyu mubano wa Kigali na Luanda ukomeje gutanga icyizere mu gushakira umuti ikibazo cya RDC. Perezida Kagame na Lourenço biyemeje gukomeza gukorana n’abandi bayobozi ba Afurika kugira ngo iki kibazo gikemuke mu buryo burambye.