Nyanza: Abagabo 3 bakekwaho gutemagura umugore w’umucuruzi batawe muri yombi.

Abagabo batatu bakekwaho gusanga mu nzu umugore w’umucuruzi bakamutema bikomeye batawe muri yombi.

Umugore witwa Tuyishime Aline ufite imyaka 26 y’amavuko utuye mu Mudugudu wa Kadusenyi mu kagari ka Mubuga mu Murenge wa Rwabicuma mu karere ka Nyanza yatemwe n’abagabo basazwe bacukura bakanapakira umucanga muri aka gace.

Tuyishime Aline yaratemwe ajya muri koma iminsi itandatu yose, aho yabanje kurwarira mu bitaro bya Nyanza aza koherezwa mu bitaro bya CHUB i Huye. Tuyishime Aline yavuze ko mu gicuku saa munani yagiye kumva umuntu mu cyumba araramo abanza kumwaka amafaranga nyuma akurikizaho kumutema.

Ubwo yari mu bitaro bya CHUB i Huye yagize ati ”Akimara kuntema nahise nikubita hasi sinamenye ibindi byakurikiyeho.”

Aba bagabo bafashwe hashize iminsi 11 ibi bibaye, bivugwa ko izi nkozi z’ibibi zihuriye zose zihuriye ku kazi ko gucukura no gupakira umucanga.

Umuvugizi wa Polisi mu Ntara y’Amajyepfo SP Emmanuel HABIYAREMYE avuga ko abafashwe uko ari batatu bafungiye kuri sitasiyo ya RIB ya Busasamana mu karere ka Nyanza.

Polisi isaba abanyabyaha kuva mu bikorwa by’ubugizi bwa nabi kuko Polisi iri maso ntaho umugizi wa nabi azayicikira.

Nsengimana Donatien.