Nyamasheke: Umuturage yabonye magazine irimo amasasu.

Umuturage witwa Izabayo Gervais, wo mu Mudugudu wa Giseke, Akagari ka Muhororo, Umurenge wa Kirimbi, mu Karere ka Nyamasheke, yabonye magazine irimo amasasu ndetse n’andi 22 ari ukwayo, ubwo yari arimo aca imirwanyasuri mu isambu ye.

Nk’uko amakuru atangazwa na Imvaho Nshya abivuga, uyu muturage yahise abimenyesha inzego z’umutekano, maze Polisi irahagera ibikuraho.

Abaturage bavuga ko ibi bikoresho bishobora kuba byahatabwe kera, cyane ko mu gihe cya Jenoside yakorewe Abatutsi, aka gace kabayemo ubwicanyi bwinshi, ndetse hakanabera zone Turquoise y’Abafaransa, aho interahamwe zanyuraga zivuye muri RDC guhungabanya umutekano.

SP Karekezi Twizere Bonaventure, Umuvugizi wa Polisi mu Ntara y’Iburengerazuba, yemeje aya makuru, agira ati: "Ni byo, ejo ku wa 28 Mutarama 2025, mu Murenge wa Kirimbi, mu Karere ka Nyamasheke, habonetse magazine irimo amasasu, itahuwe n’umuturage wacaga imirwanyasuri."

Yakomeje asaba abaturage gukomeza gutanga amakuru ku kintu cyose kidasanzwe babonye aho kwihutira kugikoraho. Yanagarutse ku kibazo cy’abana bakunze gutoragura ibikoresho by’amashanyarazi n’ibindi bita injamani, bishobora gushyira ubuzima bwabo mu kaga.

Iki si cyo kibazo cya mbere cy’amasasu ashaje abonetse muri aka karere, kuko mu kwezi gushize, mu Mudugudu wa Kigenge, Akagari ka Gasheke, Umurenge wa Bushenge, abana babiri na bo babonye gerenade ishaje ubwo bari bahiraga icyarire mu ishyamba.

Polisi isaba abaturage gukomeza kugira uruhare mu kubungabunga umutekano, batanga amakuru ku bikoresho bikekwa ko bishobora guteza ibyago.