Intambara isatira i Goma: Impunzi nyinshi  ziganjemo abafite agatubutse zirimo guhungira mu Rwanda.

Mu gihe imirwano ikaze hagati y’abarwanyi ba M23 n’ingabo za FARDC ikomeje gusatira Umujyi wa Goma, abaturage batagira ingano barimo guhunga intambara bakerekeza mu Rwanda.

Umutekano muke watumye amashuri afungwa, ingendo zigabanyuka, ndetse n’ubucuruzi hagati ya Goma na Gisenyi buhagarara.

Abaturage bari mu rujijo n’ubwoba baterwa n’amabombe avugira hafi ya Sake, Minova, na Mugunga. Ku mupaka wa Goma na Gisenyi, imbaga y’abanye-Congo ifite imizigo yoroshye ihurura, mu gihe imodoka zijyana ibicuruzwa zijya muri Congo zahagaritswe.

Ndetse n’ingendo z’indege mu Mujyi wa Goma zagabanutse ku kigero cya 70%, izindi nzira zose z’ubucuruzi n’ubwikorezi zikomeza guhungabana.

Mu nkengero za Goma, impunzi ziturutse mu bice byafashwe n’abarwanyi za M23 zirushaho kwiyongera, zishaka amahoro mu gihugu cy’u Rwanda. Aho intambara ikomeje gusatira, ubwoba bw’abaturage n’impamvu y’ubuhungiro birushaho kwigaragaza mu buryo budasanzwe.