Ngororero:RIB yataye muri yombi Babiri barimo n'umuyobozi ushinzwe ibikorwaremezo mu Karere 

Urwego rw'igihugu rw'ubugenzacyaha RIB ,kuri uyu wa Gatatu tariki ya 26 Kamena rwatangaje ko rwataye muri yombi Umuyobozi ushinzwe ibikorwaremezo,imyubakire n'ubutaka mu Karere ka Ngororero ari kumwe na  Mutabazi Celestin,Umunyamabanga Nshingwabikorwa w'Umurenge wa Nyange.

RIB ibinyujije ku rubuga rwayo rwa X yatangaje ko aba bombi bakurikiranyweho ibyaha byo gusaba no kwakira indonke no gukoresha inyandiko zitavugisha ukuri  ku mitungo y'abaturage yangijwe igihe hasanwaga umuhanda Rambura-Nyange.

Abafashwe bafungiye kuri sitasiyo ya RIB ya Kabaya mu gihe dosiye yabo iri gutunganywa kugirango ishikirizwe ubushinjacyaha.

RIB irongera kuburira abitwaza imirimo bakora bakishora mu byaha ko babireka,inashima abatanga amakuru kuri ruswa n'indi mikorere idahwitse kuko bibangamira iterambere ry'igihugu.