Neymar akeneye miliyoni 7£ ngo agure ikirwa cya Japão kiri muri Brésil.

Neymar ni umukinnyi w’ikipe y’igihugu  ya Brésil  akaba ari na rutahizamu wa Al-Hilal muri Arabie Saoudite.

Uyu mukinnyi w’imyaka 32, yasinye amasezerano y’imyaka ibiri muri Al-Hilal muri Kanama 2023 nyuma yo kuva muri Paris Saint-Germain yari amazemo imyaka itandatu.

Uyu mukinnyi ubu agiye kugura ikirwa gifite agaciro ka miliyoni 7£, uyavunje mu manyarwanda agera kuri miliyari 12,4 Frw, iki kirwa kikaba giherereye muri Brésil.

Ikirwa cya Japão gifite hegitare 2,4, kikaba kiri hafi y’icyambu cy’umujyi wa Angra dos Reis mu Majyepfo y’Uburengerazuba bwa Rio de Janeiro.

Aho kiri mu gace gaherereyemo ibindi birwa 365, gusa iki kirwa cyo cyirihariye kubera ko gifite inkengero zigizwe n’umucanga utuma benshi bahakunda.

Nyiri iki kirwa akomoka muri Canada, yishimiye ubusabe bwa Neymar wemeye kurenza miliyoni 3£ ku giciro yifuzaga kugira ngo birusheho kwihuta mu igirwa rya kino kirwa.

Iyo uri ku kibuga k’indege  cya Rio de Janeiro ugafata rutemikirere bigusaba iminota 35 kugirango ugere neza ku kirwa.