Ndabakunda nubwo ibihe bihinduka! - Ayabonga yahaye ubutumwa bukakaye Aba-Rayon

Umutoza wa Rayon Sports wongerera imbaraga abakinnyi, Ayabonga Lebitsa yahaye ubutumwa abakunzi ba Rayon Sports nyuma yo gusoza shampiyona.

Ni ubutumwa uyu mutoza ukomoka muri Afurika y'epfo yanyujije ku rukuta rwe rwa Instagram ku wa Kane tariki 29 Gicurasi 2025.

Ayabonga Lebitsa yashimiye abakunzi ba Rayon Sports uko babanya n'ikipe muri rusange ndetse yemeza ko bizahora mu mutwe we kuko atazabyibagirwa.

Yagize ati "Ndashimira cyane abafana ba GIKUNDIRO mwese mwabanye nanjye hamwe n’ikipe yanjye mu bihe byose, ibyiza n’ibibi. Icyo mwankoreye sinzacyibagirwa habe na rimwe."

Uyu mutoza muri ubu butumwa burebure yanavuze ko uyu mwaka w'imikino wari urimo ibigeragezo byinshi ariko abizeza kuzagarukana imbaraga nyinshi mu mwaka utaha nyuma yo ku ruhuka.

Yagize ati ''Uyu mwaka w’imikino wari wuzuyemo ibigeragezo, ntiwari woroshye na gato, ariko twakoze ibyo dushoboye byose. Ni igihe cyo kuruhuka, tukongera imbaraga no kwitekerezaho neza kugirango tuzagaruke dufite imbaraga nyinshi, dukomeye kurusha uko twari tumeze muri uyu mwaka."

Ayabonga Lebitsa yasoje avuga ko Imana ari yo yonyine izi ibiri imbere ariko yibutsa abakunzi ba Rayon Sports ko abakunda nubwo ibihe bihinduka.

Yagize ati " Ni Imana yonyine izi ibiri imbere yacu, ariko icyo mukwiye kumenya ni uko mbakunda cyane, kabone n'ubwo ibihe bihinduka. Nkunda GIKUNDIRO."

Ayabonga Lebitsa aheruka kugaruka muri Rayon Sports nyuma yo gusaba kongezwa amafaranga bigasa n'ibitumye ashwana n'ubuyobozi ariko bakaza kugirana ibiganiro, akagaruka.

Uyu mutoza asoje amasezerano yari afitanye na Rayon Sports ndetse yerekeje iwabo muri Afurika y'epfo mu birumuhuko.