Minisitiri Amb. Olivier Nduhungirehe na Minisitiri w’u Burusiya baganiriye ku bibazo bya Congo.

Kuri uyu wa Gatatu, tariki 5 Gashyantare 2025, Minisitiri w’Ububanyi n’Amahanga n’Ubutwererane w’u Rwanda, Amb. Olivier Nduhungirehe, yagiranye ikiganiro kuri telefone na Minisitiri Wungirije w’Ububanyi n’Amahanga w’u Burusiya, Bogdanov Mikhail Leonidovich.

Nk’uko byatangajwe na Minisiteri y’Ububanyi n’Amahanga n’Ubutwererane (MINAFFET), ikiganiro cyabo cyibanze ku guteza imbere umubano w’ibihugu byombi no kungurana ibitekerezo ku bibazo biri mu burasirazuba bwa Repubulika Iharanira Demokarasi ya Congo (DRC).

Mu butumwa MINAFFET yashyize ku rubuga nkoranyambaga X, yagize iti: “Minisitiri Olivier Nduhungirehe yagiranye ikiganiro cyiza kuri telefone na Hon. Bogdanov Mikhail Leonidovich, Minisitiri Wungirije w’Ububanyi n’Amahanga w’u Burusiya ushinzwe Ububanyi na Afurika yo Hagati n’Iburasirazuba.”

U Rwanda n’u Burusiya bisanganywe umubano mwiza ushingiye ku bufatanye mu nzego zitandukanye. Mu Ugushyingo 2024, ibihugu byombi byashyize umukono ku masezerano akuriraho visa abafite pasiporo z’abadipolomate n’iz’abakozi ba leta.

Iki kiganiro kije gikurikira ibindi Minisitiri Nduhungirehe yagiranye n’abandi bayobozi bakuru b’ibihugu byo mu karere. Ku wa 3 Gashyantare 2025, yagiranye ikiganiro na Minisitiri w’Ububanyi n’Amahanga wa Algeria, Ahmed Attaf, aho baganiriye ku bibazo by’umutekano mu karere k’Ibiyaga Bigari.

Mu cyumweru gishize kandi, Minisitiri Nduhungirehe na mugenzi we wa Afurika y’Epfo, Ronald Lamola, bemeranyije gukomeza ubufatanye mu gushakira umuti ibibazo byugarije uburasirazuba bwa DRC.

Uruhererekane rw’ibi biganiro rugaragaza uruhare rw’u Rwanda mu gushaka ibisubizo by’ibibazo by’umutekano mu karere no gushimangira umubano n’ibihugu bitandukanye.